ހުޅުމާލެ ފޭސް 1 (ހުޅުމާލެ1) ގެ ފުލެޓުތަކުގެ ކުލިން 20 ޕަސެންޓު ކުޑަކުރަން ނިންމައިފިއެވެ.
ރައީސް ޑރ.މުހައްމަދު މުއިއްޒު މިގޮތަށް ނިންމެވީ މިއަދު ހުޅުމާލޭގައި ބޭއްވި ކެމްޕޭނު އިވެންޓެއްގައި ވާހަކަފުޅު ދައްކަވަމުންނެވެ. މާލެ ސިޓީގެ މޭޔަރުގެ މަގާމަށް ވާދަކުރާ އާޒިމާ ޝުކޫރުގެ ކެމްޕޭނު ޖަލްސާގައި މިއަދު ރައީސް މުއިއްޒު ވިދާޅުވީ ހުޅުމާލެ ފޭސް1 ގެ ފުލެޓުތަކުގެ ކުލިން 20 ޕަސެންޓު އަންނަ މަހުން ފެށީގެން ކުޑަކުރަން ނިންމާފައިވާ ކަމަށެވެ. އެމަނިކުފާނު ވިދާޅުވީ އެ ފުލެޓުތަކަކީ ލޯނު ނަގައިގެން ހަދާފައިވާ އިމާރާތްތަކެއް ކަމަށާއި ލޯނަށް ދައްކަން ޖެހޭ ބައި ސަރުކާރުން ގޮތްތަކެއް ހައްދަވައިދެއްވާނެ ކަމަށެވެ. މީގެ އިތުރުން މެއިންޓަނަންސްގެ ފީގެ ގޮތުގައި ނަގަމުން އަންނަ ފައިސާގެ އަދަދުތައް ރިވިއުކުރަމުން އަންނަ ކަމަށާއި އެކަމާއި އާބަންކޯއާއި މަޝްވަރާކޮށްގެން ވަރަށް އަވަހަށް ގޮތްތަކެއް ނިންމަވާނެ ކަމަށެވެ.
މާލެ ސިޓީގެ މޭޔަރުގެ މަގާމަށް ވާދަކުރާ ކުރީގެ ބަންޑާރަ ނައިބު އާޒިމާ ޝަކޫރުގެ ކެމްޕޭނު ހަރަކާތްތަކުގައި ރައީސް ޑރ.މުއިއްޒާއި ސަރުކާރުގެ ވެރިން އަންނަނީ ވަރަށް ބުރަކޮށް މަސައްކަތް ކުރައްވަމުންނެވެ.
