ރައްޔިތުންގެ މަޖުލީހުގެ ރައީސް މުހައްމަދު ނަޝިދުގެ އިތުބާރު ނެތް ކަމުގެ މައްސަލައިގެ ޖަލްސާ ނުބޭއްވި ދިގުލައިގެން ދާތީވެ، އެމްޑީޕީން ސުޕްރީމް ކޯޓަށް ހުށަހަޅާފައިވާ ދުސްތޫރީ މައްސަލައަކީ، ރައްޔިތުންގެ މަޖިލީހުގެ ޖަލްސާ ބޭއްވުމާ ގުޅޭ މައްސަލައެއް ނޫން ކަމަށާއި އެ މައްސަލަ ސުޕްރީމް ކޯޓުގައި އޮތަސް މަޖިލީހުގެ ޖަލްސާތައް ކުރިއަށް ގެންދެވޭނެ ކަމަށް ރައްޔިތުންގެ މަޖިލީހުގެ އިދާރާއިން ބުނެފިއެވެ
މިއަދުގެ ޖަލްސާއަށްވެސް އީވާ ސަލާމް ފޮނުވުމުގެ އިތުރުން މަޖުލިސް ޖަލްސާ ބޭއްވުމުގެ މައްސަލައެއް ސްޕްރީމް ކޯޓުގައި ހިނގަމުންދާތީވެ، ޖަލްސާ ބޭއްވުމަށް އުޒުރުވެވާ ކަމަށްވަނީ މަޖުލީހުގެ އިދާރާއަށް އަންގާފައެވެ.
ރައްޔިތުންގެ މަޖުލީހުގެ އިދާރާއިން ނައިބް ރައީސް އީވާ ނެތި ޖަލްސާ ބާއްވަން ތަކުރާރުކޮށް ދެކޮޅު ހަދަމުންދާތީވެ، އެމްޑީޕީންވަނީ މި މައްސަލަ ސްޕްރީމް ކޯޓަށް ހުށައަޅާފައެވެ. ނަޝީދުގެ އާއިލީ ބޭފުޅެއް ކަމަށްވާ ނައިބް ރައީސް އީވާ ގެ ސަލާމުގައި ހުންނެވެމުން ރައްޔިތުންގެ މަޖުލީހުގެ މަސައްކަތްތައް ހުއްޓި، މަޖުލީހުގައިވަނީ މަރުތަޅު އެޅިފައެވެ.
އެ މައްސަލައިގައި، އެމްޑީޕީ މެންބަރުން ދައްކަވަނީ، މަޖިލިސް ގަވާއިދުގެ 44 ވަނަ މާއްދާއެވެ. އެ މާއްދާގައި ބުނަނީ، މަޖިލީހުގެ ރައީސާއި ނާއިބު ރައީސް މަޖިލީހުގެ ޖަލްސާގެ ރިޔާސަތު ބެލެއްޓުމަށް އުޒުރުވެރިވެއްޖެ ހާލަތެއްގައި، ގާނޫނުއަސާސީގެ ދަށުން އެކަމަށް ކަނޑައަޅާފައިވާ މަޖިލީހުގެ ފަސް މެންބަރުންގެ ތެރެއިން މެންބަރަކަށް ރިޔާސަތު ބެލެހެއްޓޭނެ ކަމަށެވެ. އެހެންކަމުން އެމްޑީޕީ މެންބަރުން ވިދާޅުވަނީ، މަޖިލީހުގެ ނައިބު ރައީސަށް ޖަލްސާގެ ރިޔާސަތަށް ވަޑައިނުގެންނެވިއްޖެނަމަ މި މާއްދާގައި ބުނާގޮތަށް، ރިޔާސަތު ބަލަހައްޓަވަން ކަނޑައެޅުއްވާފައި ތިއްބަވާ ފަސް މެންބަރުންގެ ތެރެއިން މެންބަރަކު ރިޔާސަތަށް ވަޑައިގެން ޖަލްސާ ކުރިއަށް ގެންދެވޭނެ ކަމަށެވެ.
އޭގެ އިތުރުން އިތުބާރު ނެތްކަމުގެ މައްސަލައިގެ 14 ދުވަހުގެ ނޯޓިސް މަޖިލިސް ރައީސް އާއި މަޖިލީހުގެ މެންބަރުންނަށް ދިނުމަށްފަހު، މަޖިލިސް ރައީސް މަގާމުން ވަކި ކުރުމުގެ ގަރާރު މަޖިލިސް ޖަލްސާއަށް ހުށަހެޅުމަށްފަހު، އެވަގުތު މަޖިލީހަށް ހުށަހަޅާފައިވާ އެހެން އެއްވެސް ކަމަކާމެދު ބަހުސް ކުރެވޭނީ، ނުވަތަ ގޮތެއް ނިންމަންވާނީ، މަޖިލީހުގެ ރައީސް މަގާމުން ވަކި ކުރުމުގެ ގަރާރާމެދު ގޮތެއް ނިންނުމަށްފަހުގައި ކަމަށް ވެސް މަޖިލިސް ގަވާއިދުގެ 205 ވަނަ މާއްދާގައި ބުނެފައިވާ މާއްދާވެސް އެމްޑީޕީ މެންބަރުން ވަނީ ސްޕްރީމު ކޯޓާއި މަޖުލީހުގެ ސަމާލުކަށް ގެނެސްފައެވެ.
އެ މައްސަލަ ސުޕްރީމް ކޯޓުގައި މާދަމާއަށް ވަނީ އެޖެންޑާ ކޮށްފައެވެ.
