ރައީސް ޔާމީނު ބަންދުން ދޫކޮށްލުމަށް ރޭ އެމަނިކުފާނުގެ ގޭދޮށުގައި މުޒާހަރާކުރި ބައިވެރިންނާ މުހާތަބުކޮށް ’ފިނި ކޮޓަރީގައި ނުތިބެ މަގުމަތީގައިވެސް ތިބެވެން ޖެހޭނެ‘ ކަމަށް ވިދާޅުވުމުން އެކަމަށް އާދަމް ޝަރީފު ރައްދު ދެއްވައިފިއެވެ. ޕީއެންސީގެ މަޖުލިސް މެމްބަރު އަދި ޔާމީނު ސަރުކާރުގެ ޑިފެންސް މިނިސްޓަރ އާދަމް ޝަރީފް ވިދާޅުވީ ޔާމީން ޖަލުގައި ހުންނެވިއިރު، ޕީޕީއެމް އާއި އެ ޕާޓީއާ އެކުއެކީ ހިންގާ ޕީއެންސީން ބޭއްވި މުޒާހަރާތަކުގައި އަމަލީ ގޮތުން ބައިވެރިވެވަޑައިގެންފައިވާނެ ކަމަށާއި އެ މުޒާހަރާތަކުގެ ތެރެއިން ދެ ފަހަރަށް ހައްޔަރު ވެސް ކޮށްފައިވާ ކަމަށެވެ. ޕީއެންސީގެ ނައިބް ރައީސް އެކްސްގައި ކުރެއްވި މެސެޖެއްގައި ވިދާޅުވީ އަމިއްލަ އާއިލާއާއި ދާއިރާއަށް ވަގުތު ނުދީ ކުރެވެން ހުރި ހުރިހާ ކަމެއް ކުރީ ރައީސް ޔާމީނާއި، ޕާޓީއާއި ގައުމުގެ ހައްގުގައި ކަމަށެވެ. އެ ހިތްވަރު އަބަދުވެސް ހުންނާނެ ކަމަށެވެ.
ކުރީގެ ރައީސް ޔާމީން ގޭ ބަންދަށް ބަދަލު ކުރުމުން އެމަނިކުފާނު މިނިވަން ކުރުމަށް ދެން މުޒާހަރާ ނުކުރުމަށާއި މަގުމަތި ހަލަބޮލި ނުކުރުމަށް އިންތިހާބީ ރައީސް ޑރ. މުހައްމަދު މުއިއްޒު އިލްތިމާސް ކުރެއްވި ފަހުންވެސް ޔާމީން ދިރިއުޅުއްވާ ގެ ކޮޅު ކައިރިއަށް އެއްވެ ސަޕޯޓަރުން ދަނީ އެމަނިކުފާނު މިނިވަން ކުރުމަށް ގޮވާލަމުންނެވެ. ރޭ އެއްވި ޕާޓީގެ މެމްބަރުންނާ މުހާތަބު ކުރައްވައި ޔާމީން ވިދާޅުވީ ލީޑަރޝިޕްގެ ބޭފުޅުން ބޮޑެތި މަގާމުތަކުގައި ތިބެންވީ ފިނި ކޮޓަރީގައި ނޫން ކަމަށާއި އެ ބޭފުޅުންނަށް މަގާމުތައް ލިބުނީވެސް އެމަނިކުފާނުގެ ވަރަށް ބޮޑު ހިއްސާއެއް އެކަމުގައި އޮވެ، ގުރުބާނީ ތަކެއް ވެގެން ކަމަށެވެ. އެހެން ކަމުން އެ ބޭފުޅުން މަގުމަތީގައި އުޅުމުގެ ހިތްވަރު ހުންނަން ޖެހޭނެ ކަމަށާއި މީގެ ކުރިންވެސް އެމަނިކުފާނަށްޓަކައި މަގުމަތީގައި ދެފޮތެއް ނުވެ ތިއްބެވީ އާދައިގެ އާއްމު މެމްބަރުން ކަމަށެވެ.
