ކުރީގެ ރިޔާސީ އިންތިހާބުތަކުގައި ފަންނާނުންނަކީ ވަކި ކެންޑިޑޭޓަކަށް ތާއިދު ކުރުމަށް ފަހު އެ ގޮތުގައި ތިބޭ ބައެކެވެ.
މީގެ ތެރެއިން ބައެއް ފަންނާނުން ވަކި ސިޔާސީ ފިކުރަކަށް ތާއިދުކޮށް ވާހަކަ ދައްކަން ބޭނުންވެސް ނުވެއެވެ. ސިޔާސީ ޕާޓީތަކުން ބާއްވާ ޝޯވް ތަކުގައި ޕާފޯމް ކުރިޔަސް ގިނަ ފަހަރަށް ކެމްޕެއިނު ޓީޝާޓުލައިގެން މެނިފެސްޓޯ ވިއްކަން މަގު މައްޗަށް ނިކުންނަނީ މަދު ފަހަރަކުއެވެ.
މީގެ ކުރީގެ ރިޔާސީ އިންތިހާބުތައް ފެށުމުގެ ކުރިންވެސް ފަންނާނުންގެ ވިސްނުން ހުންނަ ގޮތް އާއްމުންނާއި ސިޔާސީ ދާއިރާގައި ހަރަކާތްތެރިވާ ފަރާތްތަކަށް އިނގެއެވެ. އާއްމުގޮތެއްގައި އެމްޑީޕީއާއި ޕީޕީއެމް (ކުރީގެ ޑީއާރުޕީ) އަށް ތާއިދު ކުރާނެ ފަންނާނުންނާއި ކެމްޕެއިނު ބޮޑު ލަވަ ކިޔާދޭނެ ފަންނާނުންނާއި މިއުޒިކު ހަދާދޭނެ ފަރާތްތައްވެސް އެއީ ސިއްރެއް ޑީލެއް ނޫނެވެ.
ރާއްޖޭގައި ސޯސަލް މީޑިއާގެ އިންފުލުއެންސުން ނާއި، ޓިކްޓޮކްތަރިންނާއި ޑްރާމާ ތަރިންތައް ގިނަވެ، މި އިންތިހާބުގައި ކުރިމަތިލީ ކެންޑިޑޭޓުން ތައް ގިނަ ވުމުން ބައެއް ފަންނާނުން އެކި ދުވަހު އެކި ޕާޓީގެ (ކެންޑީޑޭޓުންގެ) ކެމްޕެއިން ހަރަކާތްތަކުން ފެންނަން ފެށިއެވެ.
މި ގޮތުން ޑރ. މުއިއްޒަށް ތާއިދު ކުރި ފަންނާނުންތަކެއް އޭގެ ދުވަސްތަކެއް ފަހުން ފެނުނީ އެމްޑީޕީގެ ބޮޑު ޖަލްސާގެ ސްޓޭޖްމަތިންނެވެ. އޭގެ ފަހުން މި ފަންނާނުން ފެންނަނީ ވީޑިއޯ ޑްރާމާއަކުންނެވެ. އެ ޑުރާމާގައި އެ ފަންނާނުން ބުނަނި މި ހުރިހާ ކަމެއްގެ ހައްލަކީ އެމްއެންޕީއޭ ބުނެ ކާނަލް ނާޒިމް (އެމްއެންޕީގެ ކެންޑީޑޭޓު) ހޯދަން ނިކުމެއެވެ. އެ ވީޑިއޯއިން ބުނެެދެނީ އެމީހުން ގޮސް ދެން ގުޅެނީ އެ ޕާޓީއާ ކަމަށެވެ.
މި ފަހަރަކީ އެންމެ މިނިވަންކަމާ އެކު އެންމެ ގިނަ ކެންޑީޑޭޓުން ނިކުތް އިންތިހާބެވެ. ހަމަ އެގޮތަށް މިނިވަން ކަމާ އެކު ތިމާ ތާއިދު ކުރާ ކެންޑީޑޭޓަކަށް ކެމްޕެއިނުކޮށް، ބިރަކާ ނުލާ ކޮޅު ބަދަލުކުރަންވެސް އެންމެ އަމާން އޮމާން އިންތިހާބެވެ. ވަކި ކޮޅެއްގަ ހުރެގެން ސަރުކާރުން ލިބޭ އިވެންޓުތައް ގެއްލި ވަކި ކޮޅެއްގަ ހުރެގެން ސަރުކާރުގެ ގިނަ ކަންކަން ނުލިބޭކަންވެސް މި 5 އަހަރު ފަންނާނުންނަށް ވަނީ ފެނިފައެވެ. ފަހަރެއްގައި މި ބަދަލުވުން ތަކަކީ އެއީ ކަމަށްވެސް ވެދާނެއެވެ. ނުވަތަ ’އަގުބޮޑު ސްކްރިޕްޓެއް ’ ހުށައަޅާ ކެންޑީޑޭޓެއް ބުނާ ޑްރާމާއެއް ކުޅެނީއެވެ.
