މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ހިންގުމުގެ އޮނިގަނޑަށް ބޮޑު ބަދަލުތަކެއް ގެނެސް ފަސް މެނޭޖިން ޑިރެކްޓަރުން ކަނޑައަޅަން އެމްއެމްއޭގެ ބޯޑުން ފާސްކޮށްފިއެވެ.
އެމްއެމްއޭގެ އިން މީޑިއާއަށް މައުލޫމާތުދެމުން ބުނެފައިވަނީ، އެމްއެމްއޭ ގެ އޮނިގަނޑަށް ބަދަލު ގެންނަން ބޯޑުން ފާސްކުރީ ޒަމާނީ ސެންޓްރަލް ބޭންކަކަށް އަދި ހެޔޮ ނަތީޖާ ނެރޭ ބޭންކަކަށް ހެދުމަށް ކަމަށެވެ. އެ ބަދަލުތަކުގެ ސަބަބުން އެމްއެމްއޭ އިން ކުރަމުންދާ މަސައްކަތްތައް މިހާރަށްވުރެ ހަރުދަނާވެ އަދި ހެޔޮ ނަތިޖާތަކެއް ނެރުމަށް ފަސޭހަވާނެ ކަމަށްވެސް ވިދާޅުވިއެވެ.
އެމްއެމްއޭގެ އޮނިގަނޑަށް ގެނައި ބަދަލުތަކުގެ ތެރޭގައި އެސިސްޓެންޓް ގަވަރުނަރުގެ މަގާމު ވަނީ މެނޭޖިން ޑިރެކްޓަރު މަގާމަށް ބަދަލުކޮށްފައެވެ. އޭރުން ފަސް ދާއިރާއަކުން ފަސް މެނޭޖިން ޑިރެކްޓަރުން ތިބޭނެއެވެ. އަދި މިހާރު ތިއްބެވި އެސިސްޓެންޓް ގަވަރުނަރުން ވަނީ އެޑްވައިޒަރުންގެ މަގާމަށް ވަނީ ޕްރޮމޯޓްކޮށްފައެވެ.
އޮފިޝަލް ވިދާޅުވީ، އެމްއެމްއޭގެ މަސައްކަތްކުރާ ތައުލީމީ އަދި ތަޖުރިބާކާރު ފަރާތްތަކަށް ފުރުސަތު ފުޅާކުރުމުގެ ގޮތުން އަލަށް ހުޅުވާލާ މެނޭޖިން ޑިރެކްޓަރު މަގާމަކީ ފަސް އަހަރުގެ ދެ ދައުރަކަށް ހޮވޭ މަގާމަށްވެސް ބަދަލުކޮށްފައިވާ ކަމަށެވެ.
އެ މާގާމުތަކަށް ކުރިމަތިލުމުގެ ފުރުސަތު އެމްއެމްއޭގައި މަސައްކަތް ކުރައްވާ ފަރާތްތަކުގެ އިތުރުން އާންމުކޮށްވެސް ހުޅުވާލާނެ ކަމަށާއި އޭގެ ސަބަބުން އެމްއެމްއޭގައި މިހާރު ތިބި ގާބިލު ފަރާތްތަކަށް އާ ފުރުސަތުތައް ހުޅުވި، ފަންނީ ގާބިލު މީހުންނަށް އެމްއެމްއޭ އަށް ވަނުމަށްވެސް ފުރުސަތު ހުޅުވިގެންދާނެ ކަމަށް ވިދާޅުވިއެވެ.
