ރައީސް ޑރ.މުހައްމަދު މުއިއްޒާއި ވަރަށް ބޮޑަށް ގާތްވުމަށް މަސައްކަތް ކުރުމަށް ސިހުރު ހެދި ކަމުގެ ތުހުމަތުގައި ހައްޔަރު ކޮށްފައިވާ ކުރީގެ ޑެޕިއުޓީ މިނިސްޓަރ ޝަމްނާޒު އަތުގައި އޮތީ ސިހުރެއް ނޫން ކަމަށާއި ސަރުކާރުން ހޯދަން އުޅެނީ އެހެން އެއްޗެއް ކަމަށް ޕީއެންއެފުން ތުހުމަތުކޮށްފިއެވެ.
ރޭ ޕީއެފްއެފް ގެ ޖަގަހަ ޖަލްސާއެއްގައި ވާހަކަ ދައްކަވަމުން ކުރީގެ ރައީސް ޔާމީން އަބްދުލްގައްޔޫމު ވިދާޅުވީ ރައީސް ޑރ.މުހައްމަދު މުއިއްޒު ސިޓީ ކައުންސިލުގެ މޭޔަރު ކަމުގެ މަގާމުގައި ހުންނެވި އިރު ޝަމްނާޒް މަސައްކަތް ކުރެއްވީ ވަރަށް އަރިހުގައި ކަމަށާއި، އެ ދުވަސްވަރު ކޮރަޕްޝަނުގެ ގިނަ މައްސަލަތަކެއް ސިޓީ ކައުންސިލުން ފެންމަތިވެފައިވާ ކަމަށެވެ. މި ގޮތުން ބައެއް މައްސަލަތައް އޭސީސީންވެސް ތަހުގީގު ކުރަމުންދާއިރު ކޮރަޕްޝަނުގެ އެތައް ހެއްކެއް ސިޓީ ކައުންސިލުގެ މެމްބަރުން އަތުގައި ހުންނާނެ ކަމަށެވެ. ޔާމީން ވިދާޅުވީ ސިހުރުގެ ނަމުގައި ޝަމްނާޒު ދިރިއުޅޭ ގެ ރެއިޑް ކުރީ މި ބާވަތުގެ މައުލޫމާތުތައް ހޯދުމުގެ ބޭނުމުގައި ކަމަށެވެ. ޝަމްނާޒު ދިރިއުޅޭ ގެ ބަލާ ފާސްކޮށް ބައެއް ތަކެތި ވަނީ ފުލުހުން ގެންގޮސްފައެވެ. ރައީސް ޔާމީނު ތުހުމަތު ކުރައްވަނީ މުއިއްޒު ހިންގަވާފައިވާ ކަރަޕްޝަނުގެ ހެކިތައް ހޯދާ ނައްތާލުން މި ރެއިޑުގެ މަގުސަދުތަކުގެ ތެރޭގައި ވެދާނެ ކަމަށެވެ.
މި މައްސަލާގައި ފުލުހުންގެ ވާހަކައަށްވެސް ޔާމީންވަނީ ފާޑުވިދާޅުވެފައެވެ. މިގޮތުން މި މައްސަލައަކި ރައީސްގެ އާއިލާއިން ހުށައަޅައިގެން އުޅޭ މައްސަލައެއް ނޫން ކަމަށް ބުނާއިރު މި މައްސަލަ ވަށާ ޖެހެނީ ރައީސްއާއި ރައީސްގެ އާއިލާއާއި ޝަމްނާޒާއި އޮތް ގުޅުމުގެ ތެރެއިން އޮތް ކަންތައްގަނޑެއްގެ ވަށައިގެން ކަމަށާއި މި މައްސަލައަށް މުޅި ދުނިޔޭގެ ސަމާލުކަން ލިބިފައިވާއިރު ފުލުހުން އަދިވެސް ހަގީގަތް ހާމަކުރަން ފަސް ޖެހެމުންދާ ކަމަށެވެ.
