ފަލަސްތީނުގެ ނަމުގައި އެއްވެސް ކަމެއްގައި ދޮގުވާހަކަ ދައްކައި ފިތުނަ ފަސާދަ ނުވުމަށް އަބްދުﷲ ޝާހިދު ގޮވާލައްވައިފިއެވެ. އެމްޑީޕީގެ ރައީސް ޝާހިދު މިހެން ވިދާޅުވީ ވެރިކަންކުރާ ޕީއެންސީގެ މަޖުލިސް މެމްބަރު އިބްރާހިމް މުހައްމަދު (ޖަނާބު) ގެ ވާހަކައަށް ރައްދު ދެއްވައި ވާހަކަ ދައްކަވަމުންނެވެ. މައްޗަންގޮޅި އުތުރު ދާއިރާގެ މަޖުލިސް މެމްބަރު އިބްރާހިމް މުހައްމަދު ސޯސަލް މީޑިއާގައި މިއަދު ވިދާޅުވީ އެމެރިކާއިން ރާއްޖެއަށް ދަތިކުރަން އުޅެނީ އަބްދުﷲ ޝާހިދު އަޑީގައި ހުރެގެން ކަމަށާއި އެކަން އެބޭފުޅާއަށް އެނގޭ ކަމަށެވެ. އަދި އެކަން ބެލުމަށްވެސް އިބްރާހިމް ވަނީ ގޮވާލައްވާފައެވެ. އެ ވާހަކައަށް ރައްދު ދެއްވައި އަބްދުﷲ ޝާހިދު ވިދާޅުވީ ފަލަސްތީނުގެ މައްސަލާގައި ގައުމު އެކަތިގަނޑެއްގައި އެއް ވާހަކައެއް ދައްކަމުންދާ ދަނޑިވަޅެއްގައި މަޖުލިސް މެމްބަރަކަށް ހުންނަވައި އިބްރާހިމް މަސައްކަތް ކުރައްވަނީ ފިތުނަ ފަސާދަ އުފައްދައި ބައިބައި ކޮށްލުމަށް ކަމަށެވެ. ޔަހޫދީން ބޭނުންވާ ގޮތަކީވެސް އެއީ ކަމަށާއި އިބްރާހިމް ގެ އަމަލުން ޔަހޫދީންނަށް ހިތްވަރު ލިބޭ ކަމަށެވެ.
މެމްބަރު އިބްރާހިމް މުހައްމަދު އެކްސްގައި ލިއުއްވި މެސެޖަަށް ގިނަ ބަޔަކު އަންނަނީ ފާޑު ކިޔަމުންނެވެ. އެގޮތުން ކޮންމެ ކަމަކަށް ދީނީ ކާޑު ކުޅެ، ފިތުނަ ފާސަދަ ދޮގު ވާހަކަ ދެއްކުން ހުއްޓާލަން ވެއްޖެ ކަމަށާއި ވެރިކަމުގައި ތިބޭ ބަޔަކު ދައްކަން ހެޔޮނުވާ ވާހަކަ ސަރުކާރަަށް ނިސްބަތްވާ މެމްބަރުން ދެއްކެވުން ހުއްޓުވާދިނުމަަށް ރައީސް މުއިއްޒު އަރިހުގައި އެދޭ ކަމަށްވެސް ބައެއް މީހުން ސޯސަލް މިޑިއާގައި ފާޅުކުރި ހިޔާލުގައި ބުނެފައިވެއެވެ.
އަބްދުﷲ ޝާހިދު ނިސްބަތްވާ އެމްޑީޕީގެ މަޖުލިސް މެމްބަރު މީކާއިލު އަހުމަދު ވަނީ އިޒްރޭލު ޕާސްޕޯޓު ބޭނުން ކުރާ މީހުން ރާއްޖެއަށް އެތެރެ ނުވެނޭނެ ގޮތަށް އަަމަލު ކުރުމަށް ބިލެއް ހުށައަޅާފައެވެ. މި ބިލުގައި އެހެން ގައުމެއްގެ ޕާސްޕޯޓެއް އޮތަސް އިޒްރޭލު ޕާސްޕޯޓެއް ގެންގުޅޭ ނަމަ އެމީހަކަށްވެސް ރާއްޖެ އެތެރެ ނުވެވޭނެ ގޮތަަށް ވަނީ ބިލުގައި ހިމަނާފައެވެ. މި ބިލު ހުށައެޅުމުން ސަރުކާރުންވެސް ވަނީ އިޒްރޭލު ޕާސްޕޯޓު ބޭނުންކުރާ މީހުން އެތެރެ ނުވެވޭނެ ގޮތަށް އިމިގްރޭޝަނުގެ ގާނޫނަށް ބަދަލު ގެނައުމަށް މަޖުލީހަށް ހުށައެޅުމަށް ނިންމާފައެވެ. ރައްޔިތުންގެ މަޖުލީހުގެ ސުޕަ މެޖޯރިޓީ ކޮންޓްރޯލު ކުރަނީ ސަރުކާރު ހިންގާ ޕީއެންސީންނެވެ.
އިޒްރޭލުގެ ޕާސްޕޯޓު ބޭނުންކުރާ މީހުން ރާއްޖެ އެތެރެ ނުވެނޭނެ ގޮތަަށް ގާނޫނަށް ބަދަލު ގެނައުމަށް ނިންމުމަ ގުޅިގެން އެމެރިކާގެ ކޮންގްރެސް މެމްބަރަކުވަނީ އެމެރިކާއިން ރާއްޖެއަށް ވަމުންދާ އެހީތަށް ކަނޑާލުމަށް ގޮވާލާފައެވެ.
