އެމްޑީޕީ ޕާލިމެންޓްރީ ގުރޫޕުގެ މެމްބަރު އަދި ކާށިދޫ ދާއިރާގެ މެމްބަރު އަބްދުﷲ ޖާބިރު އެމްޑީޕީގެ މެމްބަރު ކަމުން ވަކިކޮށްފިއެވެ. އެމްޑީޕީން ނެރުނު ބަޔާނެއްގައި ބުނެފައިވަނި ޖާބިރުގެ މައްސަލަ އެ ޕާޓީން ބެލި ބެލުމުން އަހުލާގީ މައްސަލަތަކެއް ފާހަގަވެ، ޕާޓީން ވަކި ކުރުމަށް ނިންމާފައިވާ ކަމަށެވެ. މީގެ އިތުރުން ކާށިދޫ ދާއިރާގެ ޕްރައިމަރީ ކާމިޔާބުކޮށް އެ ޕާޓީން ދީފައިވާ ޓިކެޓުގައިވެސް ދެން ވާދައެއް ނުކުރެވޭނެއެވެ.
އެމްޑީޕީން މިއަދު ގެ ޖަލްސާ ބޮއިކޮޓް ކުރުމަށް 3 ލައިން ވިޕެއް ނެރެފައިވަނިކޮށް ޖާބިރު ވަނީ މަޖުލީހުގެ ޖަލްސާއަށް ހާޟިރުވެފައެވެ. މީގެ އިތުރުން ޖާބިރުގެ އެތައް އަހުލާގީ މައްސަލަތަކާއި އާއްމު ތަންތަނުގައި ބޭނުން ކުރަން ނުޖެހޭ ހަޑިހުތުރު ބަސްތައް ބޭނުން ކުރަމުންދާތީ އާއްމުންގެ ފާޑުކިއުން އަބަދުވެސް އޮވެއެވެ. މި ފަހުން އެމްޑީޕީގެ ޕްރައިމަރީގައި ވާދަ ކުރުމަށް ފުރުސަތު ދިނުމުންވެސް ގިނަ ބައެއްގެ ފާޑުކިއުން ވަނީ އެމްޑީޕީއަށް އަމާޒުވެފައެވެ. މީގެ އިތުރުން މަޖުލީހުގެ ޖަލްސާ ތަކުގައިވެސް ޖާބިރުގެ އުޅުން ހުންނަ ގޮތުން އާއްމުންގެ ރުޅިވެރިކަމާއި ފާޑުކިއުން ޖާބިރަށާއި ކާށިދާއިރާގެ ރައްޔިތުންނާ ދޭތެރޭ އޮވެއެވެ.
