ކުރީގެ ސަރުކާރުން ދިނުމަށް ނިންމާފައިވާ ފުލެޓު ތަކުގެ ތެރެއިން ފުރަތަމަ ހަވާލުކުރާ 4000 ފުލެޓަށް ސަރުތު ހަމަވި ފަރާތްތަކުގެ ތެރެއިން 60% ފޯމު ބާތިލުވާނެ ކަމަށް އޭސީސީން ނިންމައިފިއެވެ.
މި ސަރުކާރުގެ ހައުސިން މިނިސްޓްރީން ފުލެޓު މައްސަލަ އޭސީސީއަށް ހުށައެޅުމުން އެ ފަރާތުން ވަނީ އަމިއްލަ ތަހުގީގެއް ހިންގައި ފުލެޓު ފޯމުތައް ބާތިލުވާނެ ކަމަށް ބުނާ މައްސަލަތަކެއް ފާހަގަކޮށްފައެވެ. މި ގޮތުން އެ ފަރާތުން ހާމަކުރަނީ ބައެއް ފޯމުތަކުގައި ދީފައިވާ މައުލޫމާތުތަކުގައި ފުށުއެރުންތަކެއް ހުރުމާއި މާލޭގައި ދިރިއުޅޭ ކަމަށް ބުނާ އަހަރު ދިމާ ނުވުން ފަދަ އެތައް ކަމެއް ފާހަގަވެފައިވާ ކަމަށެވެ.
ކުރީ ސަރުކާރުން ނިންމާފައިވަނީ ފުލެޓަށް ކުރިމަތިލި ހުރިހާ ފަރާތްތަކެއް ސަރުތު ހަމަވި ކަމަށް ބަލައި ފުލެޓު ދިނުމަށެވެ. މި ގޮތުން މައިގަނޑު ޝަރުތެއް ކަމަށް ބަލާފައިވަނީ އަމިއްލަ ބިމެއް ނުވަތަ ގެދޮރު ނެތް މީހަކަށް ވުމާއި ސަރުކާރުގެ އެއްވެސް ގެދޮރުވެރިކަމުގެ ސްކީމަކުން ބޯހިޔާވަހިކަމެއް ލިބިފައި ނުވާ މީހަކަށް ވުމެވެ. މި ގޮތުން ގިނަ އަދަދެއްގެ ބަޔަކު ޝަރުތު ހަމަވިއިރު ފުރަތަމަ ނިންމާ ފުލެޓު ތަކަށް ވަދެވޭނެ ފަރާތްތައް ހޮވާފައިވަނީ މި ލިސްޓުގެ ތެރެއިންނެވެ. އޭސީސީން މައްސަލަ ހުރި ކަމަށް ބުނާ 2400 ފޯމަކީ ފުރަތަމަ ފުލެޓު ލިބޭނެ ކަމަށް ކަނޑައެޅި 4000 ފޯމުގެ ތެރެއިން ބެލި ފޯމު ތަކެކެވެ. އެހެން ކަމުން މި ފަރާތްތަކުގެ ފޯމު އެއްކޮށް ބާތިލު ވާނީ ތޯ ނުވަތަ ފުރަތަމަ ފުލެޓު ލިބޭ މީހުންގެ ލިސްޓުން އުނިވާނީތޯ ނިންމާނީ ހައުސިން މިނިސްޓްރީން ކަމަށް އޭސީސީން މައުލޫމާތު ދެއެވެ.
ކުރީ ސަރުކާރުން ދީފައިވާ ގޯތި ތަކާއި ފުލެޓުތައް ދިނުމަށް މި ސަރުކާރުގެ ހައުސިން މިނިސްޓަރ ޑރ.ހައިދަރު ގެންދަވަނީ ތަކުރާރުކޮށް ދެކޮޅު ހައްދަވަމުންނެވެ. އޭސީސީއަށް މައްސަލަ ފޮނުވީވެސް ހައުސިން މިނިސްޓަރު އިސްވެ ހުންނަވައިގެންނެވެ.
