ދަ ޑިމޮކްރެޓްސް ގެ ފުރަތަމަ އެތެރޭގެ އިންތިހާބުގައި ރައީސް ކަމަށް ވާދަކުރެއްވި ހުސެއިން އަމުރު އަދި އަމުރަށް ތާއިދުކުރި ހުރިހާ ކެންޑިޑޭޓުންނަށް ނާކާމިޔާބު ވުމުން ގޮތް ދޫކޮށް ބަލި ގަބޫލުކޮށްފިއެވެ. ޑިމޮކްރެޓްސްގެ ރައީސް ކަމުގެ މަގާމަށް ހޮވުނި ހަސަން ލަތީފެވެ. އިންތިހާބު ނިމި 24 ގަޑިއިރު ފަހުން އިއުލާން ކުރި އިންތިހާބުގެ ނަތީޖާގައި ބައެއް ކެންޑިޑޭޓުންނަށް ވޯޓު ލިބުނުވަރު އިއުލާނެއް ނުކުރެއެވެ. ހަސަން ލަތީފު އިންތިހާބު ކަމިޔާބު ކުރެއްވި ކަމަށް އިއުލާން ކުރި އަދަދުތަކުގައިވެސް މައްސަލަތަކެއް ހުއްޓަސް އެއްވެސް މައްސަލައަކަށް ޑިމޮކްރެޓްސްއިން ޖަވާބެއް ނުދެއެވެ. އިންތިހާބުގެ ކަންކަމުގައި އިސްކޮށް ހަރަކާތްތެރިވި މެދުހެންވޭރު ދާއިރާގެ މަޖުލިސް މެމްބަރު އާޒިމް ވިދާޅުވީ އެ ޕާޓީގެ އެތެރޭގެ ފުރަތަމަ އިންތިހާބަށް ވުމުން މައްސަލަތަކެއް ދަތިތަކެއް ހުރުން އެކަށީގެންވާ ކަމަށެވެ.
ޑިމޮކްރެޓްސް އިންތިހާބުގެ ނަތީޖާ ދައްކާ ގޮތުން ހުރިހާ މަގާމަކަށްވެސް އިންތިހާބުވީ ހަސަން ލަތީފުގެ ޓީމެވެ. އަމުރު ޓީމުގެ ބައެއް ކެންޑިޑޭޓުންނަށް ވޯޓު ލިބުނުވަރު ފެންނަން ނެތް އިރު، އިންތިހާބުގެ ނަތީޖާ ލަސްވުމުން އެ ފަރާތްތަކުން ކުރަމުންދިޔަ ޝަކުވާވެސް ވަނީ ނިމުމަކަށް ގެނެސްފައެވެ.
ޑިމޮކްރެޓްސް ގެ މެމްބަރަކު މުރާސިލަށް ވާހަކަ ދައްކަމުން ބުނީ އެ ޕާޓީގެ އިންތިހާބުގެ ނަތީޖާ މާކުރިންވެސް އިނގޭ ކަމަށާއި، ’ރައީސް ނަޝީދާއި ދެކޮޅަށް‘ އުޅެގެން ބާކީ ވާނެކަން އެންމެންނަށްވެސް އެނގޭނެ ކަމަށެވެ. އެހެން ކަމުން އެ ނޫންގޮތެއް ނެތިގެން އިންތިހާބުގެ ނަތީޖާ ގަބޫލުކޮށް އަމުރުވެސް ހިތްރުހިގެން މިވަގުތަށް ހުރީ އެނޫން ގޮތެއް ނެތުމުން ކަމަށެވެ. އެމްޑީޕީން ވަކިވެ، އޭރުގެ ސަރުކާރުގެ ވަޒީފާތައް ދޫކޮށް ހެދި ޕާޓީގައި ހުރި މައްސަލަތަކުގެ ވާހަކަ ދައްކަން އަމުރުގެ ޓީމުވެސް ލަދުވެތިވާ ކަމަށްވެސް އެ ފަރާތުން މައުލޫމާތުދެއެވެ.
