މާލޭ މޭޔަރުގެ މަގާމުގައި ހުންނެވި ޑރ. މުއިއްޒު ރައީސުލް ޖުމްހޫރިއްޔާގެ މަގާމަށް އިންތިހާބުގެވެފައިވާތިވެ، މި މަހު 17 ގައި ހުސްވާ މާލޭ މޭޔަރުކަމަށް ވާދަ ކުރުމަށްޓަކައި އެމްޑީޕީގެ ޕްރައިމަރީގައި ވާދަކުރައްވަން މިހާރުގެ ޔޫތު މިނިސްޓަރު އަހްމަދު މަހުލޫފް ނިންމަވައިފިއެވެ.
މިއަދު އޭނާ ކުރެއްވި ޓްވީޓެއްގައި ވަނީ 17 ނޮވެންބަރު 2023 ވަނަ ދުވަހު ހުސްވާ މާލޭ މޭޔަރު މަގާމުގެ ޕްރައިމަރީގައި ވާދަކުރެއްވުމަށް އޭނާ ނިންމަވާފައިވާ ކަމަށެވެ.އެހެން ކަމުން މާލޭގެ އެންމެހާ ރައްޔިތުން މަހުލޫފަށް ތާއިީދު ކޮށްދެއްވުމަށް ވެސް އޭނާ އެދިފައި ވެއެވެ.
ޔޫތު މިނިސްޓަރ މަހުލޫފަކީ މި ސަރުކާރުގެ އެންމެ ހަރަކާތްތެރި އެއް މިނިސްޓަރެވެ. ޒުވާނުންނާއި ކުޅިވަރުގެ ދާއިރާއިން ބޮޑެތި ކާމިޔާބީ ތަކެއް މި ސަރުކާރަށް ހޯދާ ދިނުމުގައި މަހުލޫގުގެ ހިއްސާ ވަރަށް ބޮޑެވެ. ހާއްސަކޮށް އެކިއެކި ބައިނަލްއަގުވާމީ ކުޅިވަރުތަކުން ރަން މެޑެލް ހޯދުމާއި، ރާއްޖޭގައި މީގެ ކުރިން ނުބާއްވާ ވަރަށް އިންޓަނޭޝަނަލް މުބާރާތްތައް ބޭއްވުމާއި ރާއްޖެއިން ބޭރުގައި އެތުލީޓުން ތަމްރީނު ހޯދުމުގެ ކަންކަމުގައިވެސް ފާހަގަ ކުރެވޭ ބޮޑެތި ކާމިޔާބެއް ވަނީ ހޯދާފައެވެ.
