ރާއްޖޭގައި ބާއްވަން ފެންނަ ވެރިކަމުގެ ނިޒާމަކީ ބަރުލަމާނީ ނިޒާމު ކަމަށް ވަކާލާތު ކުރަމުން އައި އައުން މި ވަގުތައް މަޑުޖައްސާލާފައިވާ ކަމަށް ރައްޔިތުންގެ މަޖުލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ. މިއަދު ގެ ޖަލްސާ ފަށަމުން ބަރުލަމާނީ ނިޒާމަށް އެންމެ ބޮޑަށް ވަކާލާތުކުރަމުން އަންނަ ނަޝީދާއި އެމަނިކުފާނުގެ ޑިމޮކްރެޓްސް ޕާޓީން މި ވަގުތަށް ނިޒާމީ ވޯޓިުގެ މަސައްކަތް ހުއްޓާލީ އަލަށް އިންތިހާބުވި ރައީސް ޑރ. މުއިއްޒަށް ރިޔާސީ ފުރިހަމަ ދައުރެއް ދިނުމަށް ކަމަށާއި އެކަމުގައި އެމަނިކުފާނާއި މަޖުލީހުންވެސް ފުރިހަމަ އެއްބާރުލުން ދެއްވާނެ ކަމަށެވެ.
ބަރުލަމާނީ ނިޒާމުގެ ކަންކަން ހުއްޓާލަން ޖެހުނީ ރާއްޖޭގެ ސިޔާސީ ލީޑަރުންނާއި ސިޔާސީ ޕާޓީތަކުން އެކަމާ ދެކޮޅަށް ތެދުވުމުންނެވެ. މި ގޮތުން ނަޝީދު އެންމެ ބޭނުންވީ އެމްޑީޕީގެ ރުހުން މިކަމުގައި ހޯދުމަށެވެ. ނަމަވެސް ނަޝީދު އިސްވެ ހުންނަވައި ޕާޓީއާއި ސަރުކާރަށް އެތައް ގެއްލުމެއްދީ، މި އަހަރުގެ ރިޔާސީ އިންތިހާބުގެ ނާކާމިޔާބުކޮށްލަން ނަޝީދާއި އޭނާގެ ޕާޓީ ޑިމޮކްރެޓްސްއިން އިސްދައުރެއް އަދާކޮށްފައިވާތީ ނަޝީދު ހުށައަޅާ އެއްވެސް ކަމަކަށް މި ވަގުތު އެމްޑީޕީން އެއްބަސްވާން ބޭނުން ނުވިއެވެ. ބަރުލަމާނީ ނިޒާމަށް ތާއިދު ކުރުމާ މެދު ގޮތެއް ނިންމަން ރޭ ބޭއްވި އެމްޑީޕީގެ ގައުމީ މަޖުލީހުގައިވެސް މެމްބަރުންގެ ރޫހު ހުރީ ނަޝިދާއި ބަރުލަމާނީއަށް ނޫނެކޭ ބުނުމުގެ ވިސްނުމެވެ.
މީގެ އިތުރުން އަދާލަތު ޕަޓީންވެސް ވަނީ ބަރުލަމާނީ ނިޒާމަށް ތާއިދު ނުކުރާނެކަން ހާމަކޮށްފައެވެ. މީގެ ކުރިން ޖުމްހޫރީ ޕާޓީގެ ލީޑަރު ގާސިމް އިބްރާހިމް ވެސް ވަނީ ނިޒާމީ ވޯޓާ ބެހޭގޮތުން ކުރަން އުޅޭ މަސައްކަތް ހުއްޓާލުމާއި ބަރުލަމާނީ ގެނައުމުގެ މަސައްކަތް ހުއްޓާލުމަށް ގޮވާލާފައެވެ. މީގެ އިތުރުންވެސް ރާއްޖޭގެ ސިޔާސީ ދާއިރާގައި އުޅޭ ހުރިހާ ފަރާތްތަކުންދަނީ ބަރުލަމާނީއަށް ނޫނެކޭ ބުނަމުންނެވެ.
