ނ.ހެނބަދޫގައި ފުލުހުން ހިންގަމުންދާ މަސްތުވާތަކެތީގެ އޮޕަރޭޝަނަށް ހުރަސްއެޅި އެ ރަށު ކައުންސިލުގެ ނައިބްރައީސް އިލިޔާސް އިބްރާހިމް ހައްޔަރުކޮށްފިއެވެ.
މީޑިއާތަކާ ހިއްސާކުރި މެސެޖެއްގައި ފުލުހުން ބުނީ، މި މައްސަލައާ ގުޅިގެން ހައްޔަރުކޮށްފައި ވަނީ އުމުރުން 33 އަހަރުގެ ދިވެހި ދެ ފިރިހެނުން ކަމަށެވެ. އަދި މިއަދު އެމީހުން ހައްޔަރުކޮށްފައި ވަނީ ކޯޓު އަމުރެއްގެ ދަށުން ކަމަށް ވެސް ފުލުހުން މައުލޫމާތު ދެއެވެ. މި ދެމީހުންނަކީ ވެސް ހެނބަދޫއަށް ނިސްބަތްވާ ދެމީހުންނެވެ.
މުރާސިލަށް މައުލޫމާތު ލިބިފައިވާ ގޮތުގައި ކައުންސިލުގެ ނައިބް ރައީސް އިލިޔާސް އިބްރާހިމް ގެ އިތުރުން ހައްޔަރުކޮށްފައިވަނީ އެރަށު ހުދުތަރި މުހައްމަދު އިރުޝާދެވެ. އޭނާއަކީ މަސްތުވާތަކެއްޗާއި އެހެނިހެން ކުއްތަކުގެ ރެކޯޑުވެސް އޮންނަ ފަރާތެއް ކަމަށްވެއެވެ.
ހެނބަދޫއިން މުރާސިލަށް ވާހަކަ ދެއްކި މީހަކު ބުނީ އެ ދެ މީހުން ހައްޔަރުކޮށްފައި ވަނީ ފުލުހެއްގެ ސައިކަލަކަށް ގެއްލުންދީ، އިތުރު ފުލުހެއްގެ ސައިކަލެއްގައި ރޯކޮށްލި މައްސަލައިގައެވެ. ހެނބަދޫ ޕޮލިސް ޕޯސްޓުގައި މަސައްކަތްކުރާ ފުލުހުންނާއި ފުލުހުންގެ އާއިލާތަކާއި މުދަލަށް ގެއްލުންދޭނެ ކަމަށް މިމީހުން އިންޒާރުދީފައިވާ ކަމަށްވެއެވެ.
ފުލުހުންވެސް ވަނީ މި މީހުން ފުލުހުންގެ އާއިލާތަކަށް އިންޒާރުދީ، ބިރުދައްކަމުންދާ ކަމަށް ބުނެފައެވެ.
