މަޝްހޫރު މިއުޒިޝަނުން ކަމަށްވާ އީސާ އަބްދުﷲ (އީސަ) އާއި މުހައްމަދު ނަވީޒް ސަލީމް (އައްކު) ދަ ޑިމޮކްރެޓިކްސް އިން ވަކިވެ ’މިނިވަނުން‘ ގޮތުގައި ތިބުމަށް ނިންމައިފިއެވެ. ރައީސް ނަޝީދު އަލަށް އުފެއްދި ޕާޓީ ދަ ޑިމޮކްރެޓްސްއާއި ގުޅުނު ފުރަތަ މެމްބަރުންގެ ތެރޭގައި ހިމެނޭ މި ދެ ފަންނާނުން އެ ޕާޓން ވަކިވީ ހިތް ހަމަ ނުޖެހުންތަކާ އެކުގައެވެ.
ރީތި ދިވެހި އެތައް އަމިއްލަ ލަވަތަކެއް ހަދާފައިވާ އީސަ ބުނާ ގޮތުން ދަ ޑިމޮކްރެޓްސް ޕާޓީން ވަކިވީ އުއްމީދު ކުރި ގޮތަށް އެއްވެސް ކަމެއް ނުދިއުމުންނެވެ. ޑިމޮކްރެޓްސް ގެ ހަރުގެ ބައްދަލުވުން ތަކުގައި އަމަލީ ގޮތުން ވެސް އުޅެފައިވާ އީސަ ގެ ތުހުމަތުތަަކާއި ހިތްހަމަ ނުޖެހުންތައް ވަރަށް ގިނައެވެ. ޑިމޮކްރެޓްސްއިން ވަކިވުމަށް އީސަ ފޮނުވި ސިޓީގައި ބަޔާންކޮށްފައިވާ ގޮތުގައި ރާއްޖޭގެ ސިޔާސީ ޕާޓީތައް ހިނގަމުންދަނީ ރައްޔިތުންނާ ދައުލަތަށް އެންމެ ފައިދާ ހުރި ގޮތުގައި ނޫން ކަމަށެވެ. ޕާޓީން ވަކިވެ އީސަ ވަނީ ސޯސަލް މީޑިއާގައި ޑިމޮކްރެޓްސްގެ ވެރިންނަށް ވަރަށް ބޮޑަށް ފާޑުވިދާޅުވެ، އެކިއެކި މައްސަލަތަކުގެ ތުހުމަތުވެސް ކޮށްފައެވެ.
ދިވެހި ދައުލަތަށް އެތައް ހިދުމަތްތަކެއް ކުރަމުންދާ އާއިލާއަކަށް ނިސްބަތްވާ މައިޒާންގޭ ނަވީޒު (އައްކު ) ވެސް ދަ ޑިމޮކްރޭޓްސް ޕާޓީން ވަކިވީ އެތައް ހިތްހަމަ ނުޖެހުންތަކާ އެކުގައެވެ. ސަރުކާރުގެ ސިޔާސަތުގެ ތެރެއިން މަސްތުވާތަކެތީގެ މައްސަލަ ހައްލުކުރުމަށް އެންޑީއޭ އިން ކުރަމުން އަންނަ މަސައްކަތަށް ވަރަށް ބޮޑަށް ފާޑުކިޔަމުން އަންނަ އައްކު ބުނާ ގޮތުން ކޮންމެ ޕާޓީއެއްވެސް އަދި ޕާޓީތަކުން ސަރުކާރު ހިންގަނީވެސް ރައްޔިތުންގެ މާބޮޑު ހިއްސާއެއްނެތި ބަހެއް ނެތިއެވެ. އެހެން ނަމަ އައްކުމެން ފަދަ ޒުވާނުން ފާޅުކުރަމުންދާ ހިޔާލަށް ކޮންމެވެސް ހައްލެއް ލިބޭނެއެވެ.
