މަޝްހޫރު ހިޖާމާ ކުލިނިކު ’ފަޒީސް ހިޖާމާ ތެރަޕީ‘ ބަންދު ނުކުރާ ކަމަށާއި އެތަނުގައި މިހާރުވެސް ހިދުމަތް ދެމުންދާ ކަމަށް، ފަޒީ ހިޖާމާ ކުލިނިކުން ބުނެފިއެވެ.
ފަޒީސް ހިޖަމާ ތެރަޕީގެ ވެރިޔާ ފަޒީލާ އުސްމާން، މުރާސިލަށް މައުލޫމާތު ދެމުން ބުނީ ސަރުކާރުގެ އެއްވެސް އިދާރާއަކުން އެ ކުލިނިކު ބަންދު ކުރަން އަދި އެއްވެސް ފިޔަވަޅެއް އަޅަން ނިންމާފައިވާ ކަމަށް އަންގާފައި ނުވާ ކަމަށާއި އެކަމާ ބެހޭ އެއްވެސް މައުލޫމާތެއްވެސް ލިބިފައިނުވެއެވެ.
ފަޒީލާ މުރާސިލަށް މައުލޫމާތު ދެމުން ބުނީ ’އަޅުގަނޑަށް ތި ހުރިހާ ހަބަރެއް ފެންނަނީ ބައެއް މީޑިއާއިން ނުވަތަ ސޯސަލް މީޑިއާއިން، ސަރުކާރުގެ އެއްވެސް އިދާރާއަކުން އެއްވެސް އެއްޗެއް އަންގާފައެއް ނެތް، ދޭތެރެ ދޭތެރެއިން ބައެއް ނޫސްތަކުގައި އެފަދަ ހަބަރު ލިޔަނީ ކީއްވެގެން ކަމެއް ނޭންގެ‘ އެވެ.
ބައެއް މީޑިއާ ތަކުގައި ފަޒީލާ ހަދާފައިވަނީ އޮންލައިން ކޯހެއް ކަމަށް ބުނާ ބުނުންވެސް އޭނާ ދޮގު ކުރެއެވެ. ފަޒީލާ ބުނާ ގޮތުން ޔޫކޭއިން ހިޖާމާ ކޯހެއް ހެދީ ’ފޭސްޓު ފޭސްކޮށް‘ އެތަނަށް ހާޒިރު ވެގެންނެވެ. އަދި މީނުންވެސް ގިނަ ކޯސްތަކެއް ހަދައި ހިޖާމާ ފަރުވާއާއި ބެހޭ ގޮތުން ވަރަށް ގިނަ ކަންތައްތަކެއް ވަނީ ދަސްކޮށްފައެވެ.
ގިނަ އަދަދެއްގެ ބަޔަކު ފަރުވާ ހޯދަމުން އަންނަ ފަޒީގެ ހިޖާމާ ކުލިނިކާ ބެހޭގޮތުން ފަޒީލާ ބުނީ އެތަން ހުންނާނީ ހެލްތު މިނިސްޓްރީގެ މިންގަނޑަށް ފެތޭ ގޮތަށް ސިއްހީ ފަރުވާ ދޭ ތަންތަނުގައި ހުންނަން ޖެހޭ ގައިޑްލައިންއާއި އެއްގޮތަށެވެ.
