ރައްޔިތުންގެ މަޖުލީހުގެ ރައީސް އަދި ނައިބު ރައީސް ރިޔާސަތު ނުބެލެހެއްޓޭ ހާލަތްތަކުގައި ނުވަތަ ރައީސާއި ނައިބު ރައީސް ހާޒިރު ނުވާ ޖަލްސާތަކުގައި ރިޔާސަތު ބަލަހައްޓާނެ މެމްބަރުން ތަރުތީބު ކޮށްފިއެވެ.
ރައްޔިތުންގެ މަޖުލީހުގެ ގަވައިދު ބުނާ ގޮތުން އެފަދަ ހާލަތްތަކުގައި މަޖުލީހުގެ ރިޔާސަތު ބަލަހައްޓާނީ މަޖުލީހުގައި އެންމެ ދުވަސްވީ މެމްބަރުންގެ ތަރުތީބުންނެވެ. އެ ގޮތަށް ނަންތައް ތަރުތީބުކޮށް ނިންމާނީ މަޖުލީހުގެ ރައީސެވެ. މި ގޮތުން ރައްޔިތުންގެ މަޖުލީހުގެ ރައީސް އަބްދުއްރަހީމު ކަނޑައެޅުއްވި ތަރުތީބަކީ:
މީދޫ ދާއިރާގެ މެންބަރު އަހުމަދު ސިޔާމް މުހައްމަދު – މަޖިލީހުގައި މެދުނުކެނޑި 19 އަހަރު
މާމިގިލި ދާއިރާގެ މެންބަރު ގާސިމް އިބްރާހީމް – މަޖިލީހުގައި މެދުނުކެނޑި 15 އަހަރު
އޭދަފުށި ދާއިރާގެ މެންބަރު އަހުމަދު ސަލީމް – މަޖިލީހުގައި މެދުނުކެނޑި 15 އަހަރު
ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ – މަޖިލީހުގައި މެދުނުކެނޑި 15 އަހަރު
މަހިބަދޫ ދާއިރާގެ މެންބަރު އަހުމަދު ތާރިގު – މަޖިލީހުގައި މެދުނުކެނޑި 10 އަހަރު
މަޖުލީހުގެ ގަވައިދު ބުނާ ގޮތުން މެންބަރުންގެ ތަރުތީބު ކަނޑައަޅާނީ އެ ފަސް މެންބަރުންގެ މެންބަރުކަމުގެ މުއްދަތަށް އިސްކަންދީގެންނެވެ. އެގޮތުން، މެންބަރުކަމުގެ މުއްދަތު ދެ މެންބަރެއްގެ ދޭތެރޭގައި ހަމަހަމަވެއްޖެ ހިނދެއްގައި އެފަދަ މެންބަރުން ތަރުތީބުކުރާނީ އެ މެންބަރުންގެ އުމުރުގެ ދޮށީކަމަށް އިސްކަންދީގެން ކަމަށް ވެސް މަޖިލީހުގެ ގަވާއިދުގައިވެއެވެ.
