ކުރީގެ ރައީސް އަބްދުﷲ ޔާމީންގެ މައްޗަށް ކޮށްފައިވާ ހުކުމުން މިނިވަންކުރުމުގެ މަސައްކަތް ރީތިކޮށް ގެންދިއުމުގެ ފުރުސަތަކަށް އިންތިހާބީ ރައީސް ޑރ. މުހައްމަދު މުއިއްޒު ރޭ އެދިވަޑައިގެންފައިވަނިކޮށް، ޔާމީން މިނިވަން ކުރުމަށް ގޮވާލައި، އެމަނިކުފާނުގެ ގެކޮޅު ކައިރިއަށް ސަޕޯޓަރުން އެއްވެ މުޒާހަރާ ކޮށްފިއެވެ.
މި މައްސަލާގައި ފާޑުކިޔުން އަމާޒުވުމުން ޕީޕީއެމް މެމްބަރަކު ވިދާޅުވީ ރައީސް ޔާމީން ދިރިއުޅުއްވާ ގެކޮޅު ކައިރިއަށް އެއްވެ އެމަނިކުފާނު ދޫކޮށްލުމަށް މުޒާހަރާ ކުރީ ޔާމީންގެ ވަކީލު ޑރ.ޖަމީލުި އިސްވެ ހުންނަވައި ދެއްވި އިރުޝާދުގެ މަތިން ކަމަށެވެ. ސޯސަލް ސެންޓަރުގައި ރޭގެ ރޫހު ހުރީވެސް އެއްވެސް ހަމަނުޖެހުމެއް ނެތި ވެރިކަން ހަވާލުވުމުގެ ކަންތައްތައް ތަކުގައި ސަރުކާރަށް އެއްބާރުލުން ދިނުމާއި ޕީޕީއެމް މެމްބަރުންގެ ފަރާތުން ސުލްހައާއި ކާމިޔާބިގައި ވެސް ރީތި ސިފަ ދެއްކުން ކަމަށެވެ. ޕީޕީއެމް ގެ އިސް ބޭފުޅުންވެސް ވިދާޅުވެފައިވަނީ ރައީސް ސޯލިހު ކަންކަން ކުރައްވަމުން ގެންދަވަނީ ވަރަށް އަމާން އޮމާންކޮށް އެބޭފުޅުންވެސް ހިތްހަމަ ޖެހޭ ގޮތަށް ކަމަށާއި، ސަރުކާރާއި ރައީސުލްޖުމްހޫރިއްޔާ އެގޮތަށް ކަންކަން ގެންދަވާއިރު ވެރިކަމާ ހަވާލުވާ މީހުންވެސް ޖެހޭނީ އެވަރުގެ ރަނގަޅު ސިފަތައް އާއްމު ރައްޔިތުންނަށް ދެއްކޭނެ ވަރުގެ ބަޔަކަށް ކަމަށެވެ.
އިންތިހާބުގެ ވަގުތީ ނަތީޖާ އިއުލާން ކުރުމުގެ ކުރިންވެސް ރައީސް ސޯލިހާއި މުއިއްޒު ރައީސް އޮފީހުގައި ބައްދަލުކޮށް، ކުޑައިރުކޮޅެއްގެ ތެރޭގައި ރައީސް ޔާމީން ގެއަށް ބަދަލުކުރުމުންވެސް ކަންކަން ދާނީ ސުލްހަވެރިކޮށް ކަން އިނގޭއިރު މި ދަނޑިވަޅު ޕީޕީއެމް މެމްބަރުން މަގުމައްޗަށް ނިކުމެ ހަލަބޮލި ނުކުރުމަށް ޕީޕީއެމް ބައެއް އިސްވެރިންވެސް އިރުޝާދުދެއެވެ.
ރޭގެ މުޒާހަރާ ކުރުމަށް ޖަމީލު ޕްރެޝަރު ކުރީ ކޮން ސަބަބުތަކެއް ހުރެގެންކަން މިހާތަނަށް މީޑިއާގައި ޖަމީލު އެއްވެސް އެއްޗެއް ވިދާޅެއް ނުވެއެވެ. އިންތިހާބުގެ ވަގުތީ ނަތީޖާ އިއުލާން ކުރުމުގެ ކުރިންވެސް ޖަމީލު ގޮވާލާފައިވަނީ އެމްޑީޕީގެ އިސްބޭފުޅުން ކަމަށްވާ ޑިފެންސް މިނިސްޓަރ މާރިޔާ، އެމްޓީސީސީ އެމްޑީ އާދަމް އާޒިމް ފަދަ ބޭފުޅުންގެ ޕާސްޕޯޓު ހިފަހައްޓާއި ފުރައގެން ދިޔަ ނުދިނުމަށެވެ.
