އިންތިހާބީ ނައިބު ރައީސް، އަދި ރައްޔިތުންގެ މަޖިލީހުގެ ފަރެސް މާތޮޑާ ދާއިރާގެ މެންބަރު ހުސެއިން މުހައްމަދު ލަތީފް، (ސެމްބެ) ނިިމިދިޔަ ރިޔާސީ އިންތިހާބުގައި ވާދަ ކުރެއްވީ ޕީޕަލްސް ނެޝަނަލް ކޮންގްރެސް (ޕީއެންސީ) ގެ މެންބަރެއްގެ ގޮތުގައި ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެެވެ.
ހުސެއިން މުހައްމަދު ލަތީފު މީގެ ކުރިން ހުންނެވީ ޕީޕީއެމްގެ މެންބަރެއްގެ ގޮތުގައެވެ. ޕީޕީއެމް އާއި ޕީއެންސީއަކީ ކޯލީޝަނެއްގެ ތެރެއިން އެކުއެކީގައި ސިޔާސީ މަސައްކަތްތައް ކުރަމުން އަންނަ ދެ ޕާޓީއެވެ.
ރައްޔިތުންގެ މަޖިލީހުގެ މިއަދުގެ ޖަލްސާ ފައްޓަވަމުން މަޖިލިސް ރައީސް މުހައްމަދު ނަޝީދު ވިދާޅުވީ، އިންތިހާބީ ނާއިބު ރައީސް ރިޔާސީ އިންތިހާބުގައި ބައިވެރިވެވަޑައިގަތީ، ޕާޓީ ބަދަލު ކުރައްވައި، ޕީޕަލްސް ނެޝަނަލް ކޮންގްރެސް (ޕީއެންސީ) އާ ގުޅިވަޑައިގެން އެކަމާބެހޭ ލިޔުންތައް ރައްޔިތުންގެ މަޖިލީހަށް ހުށަހެޅުއްވުމަށްފަހުގައި ކަމަށެވެ.
އެކަމާބެހޭ ލިޔުންތައް، އިލެކްޝަންސް ކޮމިޝަނުން ވެސް މަޖިލީހަށް ހުށަހަޅާފައިވާތީ، މިހާރު އޭނާއަކީ ޕީއެންސީގެ މެންބަރެއްގެ ގޮތުގައި މަޖިލީހުގައި ހިމެނޭ ސިޔާސީ ޕާޓީތަކުގެ ދަފްތަރުގައި ހިމަނާފައިވާ ކަމަށްވެސް މަޖިލިސް ރައީސް ވިދާޅުވިއެވެ.
ހުސެއިން މުހަައްމަދު ލަތީފު (ސެމްބެ) ޕީޕީއެމް ދޫކޮށް ޕީއެންސީއަށް ސޮއިކުރީ ކޮން ދުވަހަކުކަން އަދި އެ ދުވަސްވަރު އެ ވާހަކަތައް ދެކެވިފައިނެތަސް، ރިޔާސީ އިންތިހާބު ކާމިޔާބު ކުރެއްވި ޑރ.މުއިއްޒު ޕީޕީއެމް ދޫކޮށް ޕީއެންސީއަށް ސޮއިކުރީ ޕީއެންސީގެ ފަރާތުން ރިޔާސީ އިންތިހާބުގެ ޓިކެޓް ހޯދުމަށެވެ. އެތެރޭގެ އިންތިހާބުގައި ދެ ވޯޓު ތަފާތުން ޑރ. މުއިއްޒު ކުރި ހޯއްދެވީ ކުރީގެ ޑިފެންސް މިނިސްޓަރ އާދަމް ޝަރީފާއި ވާދަކުރެއްވުމަށް ފަހުގައެވެ.
