ފަތުރުވެރިކަމުގެ ދާއިރާހެ މުއައްޒަފުންގެ ހައްގު އެންމެ ބޮޑަށް ހޯދައިދިނީ މި ވެރިކަމުގައި ރައީސް އިބްރާހިމް މުހައްމަދު ސޯލިހު ކަމަށާއި އެހެން ކަމުން މިމަހުގެ ނުވަނަ ދުވަހު ބާއްވާ ރިޔާސީ އިންތިހާބުގައި ރައީސް އިބްރާހީމް މުހައްމަދު ސޯލިހަށް ތާއިދުކުރެއްވުމަށް ޓޫރިޒަމް އެމްޕްލޯއީސް އެސޯސިއޭޝަން އޮފް މޯލްޑިވްސް (ޓީމް)އިން ނިންމައިފިއެވެ.
ޓީމުން ރޭ ނެރުނު ބަޔާނެއްގައި ބުނީ މީގެ ކުރިން އެއްވެސް ސަރުކާރެއްގައި ޓޫރިޒަމް ދާއިރާގެ މުވައްޒަފުންގެ ހައްގުތައް ހޯދައިދިނުމަށް މަސައްކަތް ކޮށްދީފައި ނުވާ މިންވަރަށް ރައީސް ސޯލިހުގެ ސަރުކާރުން ވަނީ ޓޫރިޒަމް ދާއިރާގެ މުވައްޒަފުންގެ ހައްގުތައް ހޯދުމަށް މަސައްކަތް ކޮށްދީފައި ކަމަށެވެ.
އެގޮތުން ރައީސް ސޯލިހު ވަނީ އައިއެލްއޯ އަދި ބައިނަލްއަގުވާމީ ޖަމިއްޔާތަކާއި ގުޅުން ބަދަހިކުަރއްވާފައި ކަމަށާއި ރައީސް ސޯލިހު ވަނީ މިނިމަމް ވޭޖް ކަނޑައަޅައި ރިސޯޓުތަކުގެ މުވައްޒަފުންނަށް މުސާރައިގެ ބޮޑު ކުރިއެރުމެއް ގެނެސްދީފައިކަމަށް ޓީމުން ބުންޏެވެ. އުސޫލެއް ނެތި ވަޒީފާއިން ވަކިކުރުން ހުއްޓުވުމަށް މި ސަރުކާރުން ގަވާއިދު އެކުލަވާލައި ރިސޯޓު މުވައްޒަފުން އެދުނު ގޮތަށް ސްކޫލް ޗުއްޓީ ވެސް ވަނީ ބަދަލުކޮށްފައި ކަމަށެވެ.
މި ސަރުކާރުން ވަނީ ރިސޯޓުގައި މަސައްކަތްކުރާ ވަގުތު ފިޔަވައި ހުސް ވަގުތުތަކުގައި އެއްވެސް ހުއްދައެއް ހޯދުމެއް ނެތި ރިސޯޓުން ފޭބޭނެ ގޮތަށް ބަދަލުކޮށްފައިކަމަށް ޓީމުން ބުންޏެވެ. އަދި މަސައްކަތު މާހައުލު ސަލާމަތާއި ރައްކާތެރިކަމުގެ ބިލް މަޖިލީހަށް ހުށަހަޅައި، އިންޑަސްޓްރިއަލް ރިލޭޝަން ބިލަށް އިސްލާހުތަކެއް ގެނެސްފައިވާ ކަމަށް ޓީމުން ބުންޏެވެ.
”އެހެންކަމުން މ ޖަމިއްޔާގެ ގިނަ މެންބަރުން މިދެންނެވި ކަންކަން ބަލައިގަންނަ ކަމާއި އަދި ކުރިއަށް މިއޮތް ދައުރުގައި ޓޫރިޒަމް ދާއިރާގެ މަސައްކަތްތެރިންނަށް ހާއްސަ މުހިންމު ސިޔާސަތުތަކެއް އެކުލަވާފައިވާތީ ކުރިއަށް މިއޮތް ރިޔާސީ އިންތިހާބުގައި ރައީސް އިބްރާހީމް މުހައްމަދު ސޯލިހަށް ތާއިދު ކުރުމަށް ނިންމާފައިވާ ކަމުގައި ދަންނަމެވެ“ ޓީމުން ބުންޏެވެ.
ރިސޯޓް މަސައްކަތްތެރިންނަށް އެކަށޭނެ ސިޔާސަތު ތަކާއި އެންމެފައިދާ ހުރި ގޮތަކީ ރައީސް ސޯލިހު އިންތިހާބުވުންކަމަށް ޓީމުން ބުންޏެވެ. އަދި ރައީސް ސޯލިހު އިންތިހާބުކޮށްދެއްވުމަށް ރިސޯޓު ދާއިރާގެ މުވައްޒަފުން މަސައްކަތް ދިނުމަށް ޓީމުން ވަނީ އެދިފައެވެ.
ރައީސް ސޯލިހު ވަނި ކުރިއަށް އޮތް ދައުރުގައި ރިސޯޓު މުވައްޒަފުންނަށް ހާއްސަކޮށްގެން ވައުދުތަކެއް ވެވަޑައިގެންފައެވެ. މި ގޮތުން ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކަށް ހާއްސަ ބޯޯހިޔާވަހިކަމާއި، ފަތުރުވެރިކަމުގެ ދާއިރާގެ އިސް ސަފަށް ދިވެހިން އައްޔަން ކުރުމުގެ މަސައްކަތް ކުރާނެ ކަމަށް އެމަނިކުފާނުވަނީ ވިދާޅުވެފައެވެ.
