ކުރިން ޕީޕީއެމް ގައި ހުންނެވި އަދި އެ ޕާޓީގެ ނައިބްރައީސް، ޕީޕީއެމް ދޫކުރަށްވާ ޕީއެންސީ އަށް ސޮއިކުރިތާ މަދު ވަގުތުކޮޅެއްގެ ތެރޭގައި އެ ޕާޓީގެ ފަރާތުން ވާދަކުރާ ރިޔާސީ ކެންޑިޑޭޓް ގެ މަގާމު ޑރ. މުއިއްޒު ކާމިޔާބު ކުރައްވައިފިއެވެ.
މާލެ ސިޓީގެ މޭޔަރުކަންވެސް ކުރައްވަމުން ގެންދަވާ މުއިއްޒު އިންތިޚާބު ކާމިޔާބު ކުރީ 25 ވޯޓުންނެވެ. އޭނާއާ ވާދަކުރެއްވި، މަޑުއްވަރީ ދާއިރާގެ މެމްބަރު އާދަމް ޝަރީފަށް ލިބިވަޑައިގަތީ 23 ވޯޓެވެ
ޕީއެންސީގެ ޓިކެޓްގައި ރިޔާސީ އިންތިޚާބުގައި ވާދަ ކުރެއްވާނެ ކެންޑިޑޭޓެއް ކަނޑައެޅުމަށް އެ ޕާޓީގެ ސެނެޓްގެ މެމްބަރުންގެ މެދުގައި ސިއްރު ވޯޓެއް ބޭއްވީ މިއަދު ހަވީރު 4:00 ގައި ޕީއެންސީ އޮފީހުގައެވެ.
ޕީއެންސީއިން ރިޔާސީ ކެންޑިޑޭޓެއް ކަނޑައެޅީ، ޕީޕީއެމްގެ ރިޔާސީ ކެންޑިޑޭޓް ރައީސް އަބްދުﷲ ޔާމީނަށް ކޮށްފައިވާ ޖަލު ހުކުމުގެ ސަބަބުން ރިޔާސީ އިންތިޚާބުގައި ވާދަނުކުރެއްވޭ ހާލަތެއްގައި އެ ކޯލިޝަންގެ ފަރާތުން ކުރިމަތި ލުމަށެވެ.
ޔާމީނުގެ ކެންޑިޑެންސީ އިލެކްޝަން ކޮމިޝަނުން ބަލައިނުގަތުމުން އެ މައްސަލަ ޕީޕީއެމްގެ ފަރާތުން މިހާރު ވަނީ ސްޕްރީމް ކޯޓަށް ހުށައަޅާފައެވެ. އެ މައްސަލައިގެ އަޑުއެހުމެއް މާދަމާއަށް ވަނީ ތާވަލުކޮށްފައެވެ.
ޔާމީނުގެ ރަނިން މޭޓުކަމަށް ކަނޑައަޅާފައިވަނީ ކުރިންވެސް ޔާމީނުގެ ނައިބެއްގެ ގޮތުގައި ހުރި ޑރ. ޖަމީލެެވެ.
