އިންޑިއާއިން ބޭސް ފަރުވާ ހޯދަމުންދާ ދިވެހިން އެންމެ ގިނައިން ހިދުމަތް ހޯދަމުންދާ މަނިޕާލު ހޮސްޕިޓަލަށް އާސަންދަ ހިދުމަތް ދިނުން ހުއްޓާލައިފިއެވެ.
ދައުލަތުގެ ހަރަދުތައް ބޮޑުވެ، ހަރަދު ކުޑަ ކުރުމުގެ ފިޔަވަޅުތަކުގެ ތެރެއިން އާސަންދައަށް ކުރަމުންދާ ހަރަދުތައް ވެސް ރިވިއު ކުރަމުންދާ ދަނޑިވަޅުގައި މިއީ މިހާތަނަށް އާސަންދަ ކުންފުނިން ނިންމި އެންމެ ބޮޑު އެއް ނިންމުމެވެ. އެ ކުންފުނީގެ ފަރާތުން ބައެއް މީޑިއާތަކަށް މައުލޫމާތު ދެމުން ބުނެފައިވަނީ މަނިޕާލު ހޮސްޕިޓަލަށް އާސަންދަ ހިދުމަތް ދިނުން ހުއްޓާލީ އަގު ބޮޑުވެ ވަގުތީ ގޮތުންނެވެ. ނަމަވެސް އެ ކުންފުނީގެ މުއައްޒަފަކު މުރާސިލަށް މައުލޫމާތު ދެމުން ބުނީ އާސަންދައިން ހަރަދު ކުޑަ ކުރުމުގެ ފިޔަވަޅުތަކެއް އަޅަމުން އަންނަ ކަމަށާއި، މަނިޕާލު ހޮސްޕިޓަލަށް އާސަންދަ ދިނުން ހުއްޓާލީ އޭގެ ތެރެއިން ކަމަށެވެ.
މަނިޕާލު ހޮސްޕިޓަލުން އަލަށް ހިދުމަތް ހޯދަމުން އަންނަ ބަލި މީހުންނަށް އާސަންދަ ދިނުން ހުއްޓާލިޔަސް ފޮލޯއަޕް ހަދަމުންދާ ބަލި މީހުންނަށް އާސަންދަ ލިބޭނެއެވެ.
އާސަންދައިގެ ދަށުން ރާއްޖެއިން ބޭރުން ދިވެހީންނަށް އެންމެ ގިނައިން ޚިދުމަތް ލިބެނީ އިންޑިއާގެ ހޮސްޕިޓަލްތަކުންނެވެ. މަނިޕާލު ހޮސްޕިޓަލަށް އާސަންދ ދިނުން ހުއްޓާލުމުން ގިނަ ބަޔަކު އަންނަނީ ނުރުހުން ފާޅު ކުރަމުންނެވެ. އާސަންދަ ހޯދުމުގައި މިހާރުވެސް ދަތިތަކެއް ހުރި އިރު އެންމެ ގިނައިން ބޭރުން ހިދުމަތް ހޯދާ ހޮސްޕިޓަލު ތަކަށް އާސަންދަ ދިނުން ހުއްޓާލުމުން ގިނަ ބަޔަކަށް ދަތިތަކެއް ދިމާވާނެއެވެ.
