ށ. އަތޮޅުގެ ގިނަ ރަށްތަކަކަށް މުދާ އުފުލާ ’އުޅިއަށި‘ ބޯޓު ގިނަ އަދަދެއްގެ މުދަލާއެކު އަޑިއަށް ހިނގައްޖެއެވެ.
އެމްއެންޑީއެފުން މައުލޫމާތުދޭ ގޮތުގައި ބޯޓު އަޑިއަށް ދިޔައީ މާލެއިން މުދާ ހިފައިގެން ށ.ބިލެތްފަހި ނެރުން ވަންނަން އުޅުމުގެ ތެރޭގައެވެ. ނެރު ކައިރިން ވަރުގަދަ އޮއިގަނޑެއްގައި ޖެހި، ބޯޓު ލައްވީ ނެރުގެ ހުޅަނގު ފަރާތު ހިލަތަކުގެ މައްޗަށެވެ. އެކަމުގެ ސަބަބުން ބޯޓު އަޑި ފަޅައިގެންގޮސް ދިޔަ ވުމުގެ ސަބަބުން ބޯޓުގެ ބޮޑުބައިވަނީ އަޑިއަށް ގޮސްފައެވެ.
އުޅިއަށި ބޯޓު މިހާރު ވަނީ ބިލެތްފަހި ފަޅަށް ވައްދާފައެވެ. ބޯޓުގެ ބޮޑުބައި އަޑިއަށް ދިއުމުގެ ސަބަބުން ގިނަ އަދަދެއްގެ މުދާ ހަލާކުވެ، ބޯޓަށްވެސް ވަނީ ގެއްލުންތަކެއް ވެފައެވެ.
’އުޅިއަށި‘ ބޯޓަކީ މާލެއާއި ށ.އަތޮޅުގެ ގިނަ ރައްތަކަކާއި ދެމެދު މުދާ ހިފައިގެން ދަތުރުކުރާ ގިނަ ދުވަސް ވެފައިވާ ބޯޓެކެވެ. މާލެއިން އުތުރަށް ދަތުރުކުރާ ބޯޓުތަކުގެ ތެރެއިން ނިސްބަތުން އެންމެ ބޮޑެތި ބޯޓުތަކުގެ ތެރޭގައި އުޅިއަށި ބޯޓު ހިމެނެއެވެ.
