އެމްޑީޕީން ރައްޔިތުންގެ މަޖުލީހުގެ ޓިކެޓަށް ވާދަކުރާ ކެންޑިޑޭޓުންގެ މެދުގައި މިއަދު ބޭއްވި ޕްރައިމަރީ ރައީސް ޑރ.މުހައްމަދު މުއިއްޒުގެ ކޮއްކޮ އަހުމަދު ގާލިބު ކާމިޔާބުކޮށްފިއެވެ.
ރައްޔިތުންގެ މަޖުލީހުގައި ކެލާދައިރާ ތަމްސީލުކުރަމުންދާ ޝަރީފު ބަލިކޮށް ގާލިބު ކާމިޔާބުކުރީ 2 ވޯޓުގެ ތަފާތުންނެވެ. ގާލިބު މީގެ ކުރިން ވަނީ ޑިއާރުޕީއާއި ޕީޕީއެމްގެ އިސް ސަފުގައި މަސައްކަތްކޮށްފައެވެ. މިއަހަރުގެ ރިޔާސީ އިންތިހާބުގައި ޖުމްހޫރީ ޕާޓީ ދޫކޮށް އެމްޑީޕީއަށް ސޮއިކުރީ ފުރަތަމަ ބުރުގެ ވޯޓުގެ ކުރިންނެވެ. ގާލިބުގެ އާއިލާއަށް ނިސްބަތްވާ އަލީ އާރިފު އަދި އިގުބާލު އާދަމް ވަނީ ދެވަނަ ބުރުގައި ރައީސް މުއިއްޒަށް ތާއިދުކޮށް ޕީއެންސީއަށް ސޮއިކޮށްފައެވެ. ރިޔާސީ އިންތިހާބުގެ ދެވަނަ ބުރުގައި ރައީސް މުއިއްޒަށް، ގާލިބު ތާއިދު ނުކުރިޔަސް އަމަލީ ގޮތުން އެމްޑީޕީގެ ރިޔާސީ ކެންޑީޑޭޓު ރައީސް ސޯލިހު ކެމްޕޭނުގައި މަސައްކަތެއް ނުކުރެއެވެ.
ކެލާ ދާއިރާގެ އެމްޑީޕީ ޓިކެޓު ގާލިބު ކާމިޔާބު ކުރުމުން އެމްޑީޕީ ބައެއް މެމްބަރުންވަނީ ޕާޓީގެ ޓިކެޓަށް ވާދަކުރުމަށް އޮންނަ އުސޫލަށް ފާޑުކިޔާފައެެވެ. ބައެއް މީހުން ބުނަމުންދަނީ އެމްޑީޕީން ރައީސް މުއިއްޒަށް ކެލާ ދާއިރާގެ ގޮނޑި ވެދުންކޮށްފި ކަމަށެވެ. މަޖުލިސް މެމްބަރުކަމުގެ ހުވާ ކުރުމުގެ ކުރިން ޕީއެންސީއަށް ބަދަލުވާނެ ކަމަށްވެސް ކެލާ ދާއިރާގެ ބައެއް ފަރާތްތަކުން އަންނަނީ ބުނަމުންނެވެ.
