މަސްވެރިންނަށް ދޭން ޖެހޭ ފައިސާވާނީ އައު ސަރުކާރާއި ހަވާލުކުރެވިފައި ކަމަށް ކުރީގެ ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެެވެ.
މި ސަރުކާރުގެ ފިޝަރީޒް މިނިސްޓަރ އަހުމަދު ޝިޔާމު ކުރެއްވި އެކްސް ޕޯސްޓަކަށް ރައްދުދެއްވައި އަމީރު ވިދާޅުވީ ކުރީ ސަރުކާރުން މަސްވެރިންނަށް ކޮންމެ ހަފްތާއަކު ފައިސާދޫކުރަމުން ގެންދިިޔަކަމަށާއި އެކަން ހުއްޓުނީ މި ސަރުކާރު ހަވާލުވިފަހުން ކަމަށެވެ. ފިޝަރީޒް މިނިސްޓަރ ވިދާޅުވި މަސްވެެރިންނަށް ދޭން ޖެހޭ އަދަދަކީވެސް ސައްހަ އަދަދެއްނޫން ކަމަށާއި މަސްވެރިންނަށް ކުރީ ސަރުކާރުން ނުދެވި ހުރި ފައިސާގެ ތަފްސީލުވެސް އަމީރުވަނީ އާއްމުންނާ ހިއްސާ ކުރައްވާފައެވެ.
ފިޝަރީޒް މިނިސްޓަރު އަހުމަދު ޝިޔާމު ވިދާޅުވީ ކުރީ ސަރުކާރުން މަސްވެރިންނަށް ދޭން ޖެހޭ 250 މިލިއަން ރުފިޔާ އޮތް ކަމަށެވެ. އަދި މިދުވަސްވަރު މަސްވެރިކަން ރަނގަޅުވުމުން ކޮންމެ ދުވަހަކު މަސްވެރިން ގިނަ އަދަދަކަށް މަސްބާނަައި، މަސް ކިރަމުންދާތީ މަސްވެރިންނަށް ދޭން ޖެހޭ ފައިސާ އަދަދު ބޮޑުވަމުންދާ ކަމަށެވެ. މިނިސްޓަރ ޝިޔާމުގެ އެކްސް މެސެޖުގެ ރައްދުގައި އަމީރު ވިދާޅުވީ އެމަނިކުފާނުގެ ސަރުކާރުން ފާސްކޮށްފައިވާ ސަޕްލިމެންޓްރީ ބަޖެޓުން އެކަނިވެސް 100 މިލިއަން ރުފިޔާ ވާނީ މަސްވެރިންނަށް ދިނުމަށް ހަމަޖައްސައިދީފައެެވެ. އަދި ކުރިން ނުދެވިފައިވާ ކަމަށް ފިޝަރީޒް މިނިސްޓަރު ވިދާޅުވަނީ ރަނގަޅު އަދަދެއްނޫން ކަމަށާއި މަސްވެރިންނަށް ފައިސާ ނުދެވިގެން އުޅެނީ ދައުލަތުގެ އިސްރާފު ބޮޑުވެގެން ކަމަށްވެސް އަމީރު ވިދާޅުވިއެވެ.
