ރައީސް ޑރ.މުހައްމަދު މުއިއްޒުގެ ވެރިކަމަށް މަހެއް ނުވަނީސް އެމަނިކުފާނު ޕާޓީ، ޕީއެންސީގެ އިސްބޭފުޅެއް އެ ޕާޓީން ވަކވުމަށް ނިންމައިފިއެވެ. މި ހަފްތާގެ ތެރޭގައި ޕީއެންސީ އިސް މަގާމުން ވަކިވާ ދެވަނަ މެމްބަރަކީ ޕީއެންސީގެ ސެނެޓަރު ޑރ.އަބްދުﷲ އިބްރާހިމްއެވެ.
ޕީއެންސީގެ ސެނެޓުންނާއި މެމްބަރުކަމުން ވަކިވުމަށް އަބްދުﷲ އިބްރާހިމް ޕީއެންސީގެ ރައީސް، ރައީސް ޑރ.މުހައްމަދު މުއިއްޒަށް އިއްޔެ ފޮނުއްވި ސިޓީގައި ވިދާޅުވީ، ޕީއެންސީގެ ސެނެޓުގައި އޭނާ މަސައްކަތް ކުރަމުން އައީ ދިވެހި ގައުމިއްޔަތާއި ރިވެތި އުސޫލުތައް ނަގަހައްޓައި ދެމެހެއްޓުމަށް ޓަކައި ރައީސް އަބްދުﷲ ޔާމީން އިސްވެ ހުންނަވައިގެން ހިންގަވަމުން ގެންދެވި ޕާޓީއަކަށްވާތީ ކަމަށެވެ.
”ނަމަވެސް މިއަދު ފެންނަމުން މިދަނީ ފާޅުގައި ރައީސް ޔާމީންގެ އަތުން ޕާޓީ ފޭރިގަނެގެން، ޖާހިލިއްޔަތާއި ހަސަދަވެރިކަމާއި އަދާވާތްތެރިކަން އިސްކުރާ ފަރާތެއްގެ އަމިއްލަ އެދުންތަކެއް ހާސިލުކުރުމާއި ގައުމިއްޔަތުގެ ތަނބުތައް ފުނޑުފުނޑު ކޮށްލުމަށްޓަކައި ގަސްދުގައި ޑިމޮކްރެޓިކް ހަމަތަކުގެ ބޭރުން ރައްޔިތުންގެ ވިންދާ ދެކޮޅަށް މީހަކު މަސައްކަތް ކުރާނޭހެން، ވަކި މީހެއްގެ ވަކިތަކުގެ ދަށަށް ޕާޓީ ގެނެސް ކަންކަން ކުރަމުން ގެންދާތަނެވެ،“
އަބްދުﷲ އިބްރާހިމް ވިދާޅުވީ، މި ހާލަތުގައި ޕީއެންސީގައި ހުރުމަކީ އިސްލާމީ ރިވެތި އުސޫލުތައް ނެގެހެއްޓުމާއި އަނިޔާވެރިކަމާއި ކޮރަޕްޝަނާއި ދެކޮޅަށް މަސައްކަތް ކުރުމާއި ގައުމިއްޔަތުގެ ރުކުންތައް ނަގަހައްޓައި ދެމެހެއްޓުމަށް ރައީސް ޔާމީންގެ ސިޔާސަތުގެ ތެރެއިން ވަކާލާތު ކުރަމުން އައި ރޫހާ ހިލާފު ކަމެއް ކަމަށެވެ.
އަބްދުﷲ އިބްރާހިމް ޕީއެންސީން ވަކިވެ، ރައީސް ޔާމީނު އުފައްދަވާ ޕީއެފްއާއި ގުޅުމަށް ނިންމާފައިވާ ކަމަށް، ޕީއެންއެފް އުފެއްދުމުގައި އިސްކޮށް އުޅުއްވާ މަލީހު ޖަމާލު ރޭ ފޭސްބުކް ޕޯސްޓެއް މެދުވެރިކުރައްވައި ވަނީ ވިދާޅުވެފައެވެ.
