ޖަލުތަކާއި ޕޭރޯލުގެ ގާނޫނުގެ ދަށުން ހުކުމެއްގައި ނުވަތަ ބަންދުގައި ހުންނަ މީހަކު ސިޔާސީ ކަންކަމުގައި ބައިވެރިނުވޭނެ ކަމަށް އޮންނަ މާއްދާ ހަނދާންކޮށްދީ، އެކަން އެގޮތަށް ތަކުރާރުވާ ނަމަ ފިޔަވަޅު އަޅާނެ ކަމަށް ކަރެކްޝަން ސަރވިސްއިން އިންޒާރުދިނީ ރަނގަޅަށް ކަމަށް އަބްދުއްރަހީމް އަބްދުﷲ ވިދާޅުވެއްޖެއެވެ. ޖަލު ބަންދުން ގޭ ބަންދަށް ބަދަލުކޮށް ދާދި ފަހުން ލުއިތަކެއް ދީފައިވާ ކުރީގެ ރައީސް ޔާމީން ގޭބަންދުން ރަށު ބަންދަށް ބަދަލުކުރީ ވަކި ސަރުތުތަކެއްގެ މަތިން ކަމަށްވާތި އެ ސަރުތުތަކާ ހިލާފުވާ ނަމަ ފިޔަވަޅު އަޅާނެ ކަމަށް ކަރެކްޝަން ސަރވިސްއިންވަނީ ބުނެފައެވެ. ރައީސް ޔާމީން ’މިނިވަނެއްގެ‘ ގޮތުގައި އުޅުމާއި ސިޔާސީ އެއްވުންތަކުގެ ބައިވެރިވަމުންދާތީ އާއްމުންގެ ފާޑުކިޔުންވެސް ވަނީ ސަރުކާރާއި ކަރެކްޝަނަށް އަމާޒުވެފައެވެ. މި އިންޒާރާ ދޭތެރޭ ޕީޕީއެމް ޕީއެންސީ ކޯލިޝަނުން ބަޔާނެއް ނުވަތަ އެއްވެސް އެއްޗެއް ބުނެފައިނުވާތީ އެކަމުގެ ބަހެއް ހޯދުމަށް އަދުރޭއާ ސުވާލުކުރުމުން ބުނީ ކަރެކްޝަނުން އެ އިންޒާރުދީފައިވަނީ ގާނޫނާ ހަވާލާދީފައި ކަމަށާއި އެކަމާ އެއްޗެއް ބުނަން ބޭނުންނުވާ ކަމަށެވެ. އަދި އެއީ އެހާ މުނާސަބު ގޮތެއް ކަމަށްވެސް ޕީއެންސީ ގެ ޗެއަރމަން އަބްދުއްރަހީމު ވިދާޅުވިއެވެ.
އައްޑޫ ސިޓީއަށް ޕީޕީއެމް ޕީއެންސީގެ އިސްބޭފުޅުން ކުރައްވާ ދަތުރުގެ ކުރިން ނޫސްވެރިން ކުރި ސުވާލުތަކަށް ޖަވާބުދެއްވަމުން އަދުރޭ ވިދާޅުވީ މީގެ ކުރިންވެސް ޕީޕީއެމް ޕިއެންސީން ގަބޫލު ކުރަނީ ރައީސް ޔާމީނުގެ ޖަލުގެ ހުކުމާއި އެމަނިކުފާނަށް ލިބެމުންދާ އަނިޔާއަކީ މި ސަރުކާރުން ގަސްތުގައި ރާވައިގެން ދޭ އަނިޔާތަކެއް ކަމަށެވެ. އެކަން އޭރުވެސް މިހާރުވެސް ބަދަލުނުވާ ކަމަށެވެ.
ރައީސް ޔާމީން މި ފަހުން ޕިޕީއެމް މެމްބަރުންނާ ބައްދަލުކޮށް ބޭއްވި އެއްވެސް ބައްދަލުވުމެއްގައި އަދުރޭ ބައިވެރިއެއް ނުވެއެވެ. މި ކަމާ ބެހޭގޮތުން ޑިރެކްޓަރ ޖެނެރަލް އޮފް ޓްރާންޝިޝަންގެ މަގާމުވެސް ފުރުއްވާ އަބްދުއްރަހީމު (އަދުރޭ) ވިދާޅުވީ މި ދުވަސްކޮޅު އުޅެން ޖެހިފައިވަނީ އިންތިހާބީ ރައީސް ޑރ.މުއިއްޒުގެ ބައެއް ކަންކަމުގައި ކަމަށާއި އެކަމުގެ ސަބަބުން އެ ބައްދަލުވުންތަކުގައި ބައިވެރި ނުވެވެނީ ކަމަށެވެ.
