އެމަނިކުފާނު އެދިވަޑައިގަންނަވަނީ ނޮވެމްބަރު 11ގައި ސަރުކާރު ބަދަލުވުން ކަމަށާއި އެކަމަށް މަސައްކަތްކުރައްވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
މިއަދު ރައީސް އޮފީހުގައި ނޫސްވެރިންނާ ބައްދަލުކޮށް، ނޫސްވެރިއަކު ކުރި ސުވާކަލަށް ޖަވާބުދެއްވަމުން ރައީސް ވިދާޅުވީ ޒަމާނުއްސުރެ ރާއްޖޭގެ ވެރިކަމުގެ ހުވާކުރާ ދުވަހަކީ ނޮވެމްބަރު 11 ކަމަށާއި އެކަންއެމިނަކުފާނު އިއާދަކޮށްދެއްވާނެ ކަމަށެވެ.
”އޭގެ މަސައްކަތް އަޅުގަނޑު ކުރަމުން އެބަގެންދަން. ގާނޫނީގޮތުން އެއަށް ހުރަހެއް ނެތް ކަމަށްވަންޏާ، ނޮވެމްބަރު 11ގައި ބަދަލުވެގެންދާނެ. ގާނޫނީ ހުރަހެއް އޮތްތޯ، ނެތްތޯ އަޅުގަނޑުމެން ބަލަމުން ގެންދާނަން. އެހެންނޫނިއްޔާ ދައުރު ހަމަކޮށް، ނޮވެމްބަރު 17ގައި ބަދަލުވެގެންދާނެ. އެކަމަކު ނޮވެމްބަރު 11 އަކީ އެކަން ކުރެވޭނެ ދުވަހެއްތޯ އަޅުގަނޑުމެން ބަލަމުން މިގެންދަނީ. އަޅުގަނޑު އެދެނީ ނޮވެމްބަރު 11 އެއީ ސަރުކާރު ބަދަލުވާ ދުވަސްކަމަށްވުން،“ އެމަނިކުފާނު ވިދާޅުވިއެވެ.
ރައީސް ވިދާޅުވީ އެމަނިކުފާނާއި ނައިބު ރައީސް ފައިސަލް ނަސީމް އިސްތިއުފާދެއްވުމަކުން ނޮވެމްބަރު 11ގައި އާ ސަރުކާރު ގެނެވެން ނޯންނާނެ ކަމަށާއި އެބޭފުޅުން އިސްތިއުފާދެއްވުމުން ދެން ވެރިކަމުގައި ހުންނަވާނީ ރައްޔިތުންގެ މަޖިލީހުގެ ރައީސް ކަމަށެވެ. އަދި ނޮވެމްބަރު 11ގައި ސަރުކާރު ބަދަލުކުރުމަށް ކުރެވެން ހުރި ހުރިހާ މަސައްކަތެއް ކުރައްވާނެ ކަމަށް ވެސް ވިދާޅުވިއެވެ.
ނޮވެމްބަރު 11 އިން 17އަށް ރައީސުލްޖުމްހޫރިއްޔާއަކަށް ހޮވޭ ބޭފުޅަކު ހުވާކުރާ ގޮތަށް ބަދަލުވީ 2013 ގެ އިންތިހާބުގައި އުފެދުނު ކަންކަމަަށް ފަހު ރައީސް ޔާމީނު އިންތިހާބުވެ، އޭރުގެ ސްޕްރީމް ކޯޓުގެ ލަފަޔާއެކު ވެރިކަމުގައި ހުންނެވި ރައީސް ވަހީދުގެ ދައުރު ނޮވެމްބަރު 17އަށް ދަންމާލުމުންނެވެ. 2103 ގެ އިންތިހާބުގައި އޭރު ވާދަކުރި ޖުމްހޫރީ ޕާޓީއާއި ޕީޕީއެމުން އިންތިހާބު ބާތިލު ކުރުމަށް ކޯޓަށް ހުށައެޅުމުން އިންތިހާބު ބާތިލުކޮށް އަލުން އިންތިހާބުތައް ބާއްވަން ޖެހުމުން ކަނޑައެޅިފައިވާ މުއްދަތަށް އިންތިހާބުގެ ކަންކަން ނިމިފައިނުވެއެވެ. 2018 ގައި އިންތިހާބުވި ރައީސް ސޯލިހު ވިދާޅުވެފައިވަނީ އެމަނިކުފާނު ވެރިކަމުގައި ގެއްލޭ 6 ދުވަހަކީ މައްސަލައެއް ކަމަށް ދެކެވަޑައި ނުގަންނަވާ ކަމަށާއި ނޮވެމްބަރު 11 ގައި ހުވާ ކުރެވޭނެ އިންތިޒާމުތައް ހަމަޖައްސަވައިދެއްވާނެ ކަމަށެވެ.
