ހުޅުމާލެ، ގުޅިފަޅު އަދި ގިރާވަރު ފަޅުން ގޯތި ލިބުނު ފަރާތްތަކަށް، އެތަނުގައި ގެދޮރު ބިނާ ކުރުމަށް ހަ ޕަސެންޓް އިންޓްރެސްޓް އަދި 10 ޕަސެންޓް އިކުއިޓީއަށް ވުރެން ބޮޑު ނުވާ ގޮތަށް ލޯން ދޫކުރަން ނިންމައިފިއެވެ. އެކަން ކުރަން ހަމަޖެހިފައިވާ ގޮތް ކަނޑައަޅާފައި ވަނީ ދެ ވަނަ ދައުރަކަށް ވާދަކުރައްވާ އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހިމް މުހައްމަދު ސޯލިހްގެ މާލެ މެނިފެސްޓޯގައެވެ.
މި ސަރުކާރުން ވަނީ މާލެއިން ގޯއްޗަށް ކުރިމަތިލާން ހުޅުވާލައި 19,000 އަށް ވުރެން ގިނަ މީހުންނަށް ގޯތި ލިބޭނެ ކަމަށް ކަނޑައަޅައިފަ އެވެ. ހުޅުމާލެ އާއި ގިރާވަރާއި ގުޅީފަޅުން ގޯތި ދޭން ނިންމާފައިވާ އިރު ހުޅުމާލެ އިން ބައެއް މީހުންނަށް ވަނީ ގޯތި ކަނޑައި ހަވާލުކޮށްފަ އެވެ. ގުޅީފަޅުން ވެސް ވަރަށް އަވަހަށް ގޯތި ކަނޑައި ރަޖިސްޓްރީކުރަން ފަށާގޮތަށް ވަނީ ނިންމައިފަ އެވެ.
މާލޭގެ ރައްޔިތުންނަށް މާލީ ބުރައަކަށް ނުވާ ގޮތަށް ގެދޮރުވެރިކަން ފޯރުކޮށްދޭން ވައުދުވެފައިވާ އިރު ކުޑަ އިންޓަރެސްޓުގައި ލޯނު ދިނުމަކީ ހޯދައިދޭ އެންމެ ބޮޑު އެއް ލުއި ކަމަށް މެނިފެސްޓޯގައިވެ އެވެ. ގެދޮރު އިމާރާތްކުރަން މިހާރު ލޯން ދޫކުރަމުން އަންނަނީ 11 ޕަސެންޓް އިންޓަރެސްޓްގައި ކަމަށާއި މިއީ ބުރައެއް ކަމުގެ ޝަކުވާ އޮވެ އެވެ.
ދެވަނަ ދައުރަކަށް ކުރިމަތިލައްވާފައިވާ ރައީސް އިބްރާހިމް މުހައްމަދު ސޯލިހުގެ ދެވަނަ ދައުރުގެ މެނިފެސްޓޯގައި މާލެއަށް މިނޫންވެސް އެހެން ގިނަ ވައުދުތަކެއްވަނީ ވެފައެވެ. ރޭގެ ކާނިވާ ސަރަހައްދުގައި ބޭއްވި ކެމްޕޭނު ޖަލްސާގައި އެކަމުގެ ތަފްސީލުތައްވަނި ހާމަކުރައްވާފައެވެ.
