މި އަހަރުގެ ރޯދަމަސް ފަހު ދިހައެއް ގުނަމުންދާއިރު ވޭތުވެދިޔަ އަހަރުތަކަށްވުރެ މި ރޯދަމަހު ފުރަތަމަ 20 ދުވަސް ވައްކަން ކުރުން އިންތިހާއަށް ބޮޑުވެފައިވާ ކަމަށް ތަފާސް ހިސާބުތަކުން ދައްކައިފިއެވެ.
މި ގޮތުންވޭތުވެދިޔަ އަހަރު ތަކަށްވުރެ އާދަޔާހިލާފަށް ގިނައިން ވައްކަން ކޮށްފައިވަނީ މިސްކިތްތަކުންނެވެ. މި ގޮތުން މި ރޯދަމަހުގެ ތެރޭގައި ތަގުވާ މިސްކިތުން އެކަނިވެސް 3 ރޭ މަތިން 7 ފަންކާ ވަނީ ވަގަށް ގެންގޮއްސައެވެ. މި މައްސަލަ ބޮޑުވެ ވައްކަންކުރާ މީހާގެ ސީސީޓީވީ ފުޓޭޖު ހާމަކުރުމުން ފުލުހުން ވަނީ އެމީހާ ހައްޔަރުކޮށްފައެވެ. މީގެ އިތުރުން ދަރުމަވަންތަ މިސްކިތުގެ ފާރުގައި ހަރުކޮށްފައިވާ ދެ ފަންކާވެސް ވަނީ ވަގަށް ގެންގޮއްސައެވެ. މި މަހުގެ ތެރޭގައި ދެ މިސްކިތެއްގެ ފެން މޯޓަރުވެސް ވަގަށް ގެންގޮސްފައިވާއިރު މި މައްސަލާގައި މީހަކު ހައްޔަރެއް ނުކުރެއެވެ.
މިސްކިތްތަކުން ފަންކާ، ފެންމޯޓަރު ފަދަ ތަކެތީގެ އިތުރުން ވަގަށް ތަރާހީހާއި ދަމު ނަމާދަށް ތިބޭ މީހުންގެ ފޯނާއި ވޮލެޓު ފަދަ ތަކެތި ނެގުމުގެ މައްސަލަވެސް ފާހަގަކުރެވެއެވެ. މިގޮތުން ރޭ ސަލާހުއްދިން މިސްކިތުގައި ދަމުނަމާދަށް ހުރި އަންހެނެއްގެ ފޯނާއި ވޮލެޓުގައި ހުރި ފައިސާ ނެގި ދެ މީހަކު ވަނީ މިއަދު ހައްޔަރުކޮށްފައެވެ.
ރޯދަމަހުގެ ފުރަތަމަ 10 އާއި ހަމައަށް އެކަނިވެސް 100އަށް ވުރެ ގިނަ ވައްކަމުގެ މައްސަލަވަނީ ޕޮލިހަށް ހުށައަޅާފައެވެ.
