ވައްކަމާއި ހިޔާނާތުގެ މައްސަލަތަކެއް ސާބިތުވެ ޖަލުގައި ހުންނެވި ކުރީގެ ރައީސް ޔާމީން ގެއަަށް ބަދަލުކޮށްފިއެވެ. މީގެ ދެ ހަފްތާ ކުރިންވެސް އެމަނިކުފާނުގެ ބަލި ހާލަތު ހުރިގޮތުން ގެއަށް ބަދަލުވާން ވަނީ އެދިފައެވެ. އިއްޔެ ބޭއްވުނު ރިޔާސީ އިންތިހާބުގައި ނާކާމިޔާބުވެ ވަޑައިގަތް ރައީސް އިބްރާހިމް މުހައްމަދު ސޯލިހު ވަނީ މުއިއްޒަށް މަރުހަބާ ވިދާޅުވެ ދެވެން އޮތް އެއބާރުލުން ދެއްވާނެކަމަށް ވިދާޅުވެފައެވެ.
ކަރެކްޝަނަލް ސާވިސްގެ ބެލުމުގެ ދަށުން ޔާމީން ގެކޮޅަށް ވަޑައިގަތްއިރު، އެމަނިކުފާނަށް މަރުހަބާ ދެންނެވުމަށް އިންތިހާބީ ރައީސް ޑރ. މުހައްމަދު މުއިއްޒާއި ގިނަ އަދަދެއްގެ ސަޕޯޓަރުންނާއި ޕީޕީއެމްގެ އިސް ބޭފުޅުން އެ ސަރަހައްދުގައި ތިއްބެވި އެވެ.
ބައެއް ސަޕޯޓަރުންނާ ސަލާމް ކުރެއްވުމަށްފަހު ޔާމީން ގެކޮޅަށް ވަދެވަޑައިގަތެވެ.
ސަރަހައްދަށް އެއްވެ ތިބި ސަޕޯޓަރުން ވަރަށް ފޯރީގައި އުފާ ފާޅުކުރަމުން ދިޔައިރު އެ އެންމެން ވެސް ގޮވާލަމުން ދިޔައީ ޔާމީން ވަގުތުން މިނިވަން ކުރުމަށެވެ. އަދި އިދިކޮޅުން އިންތިހާބު ކާމިޔާބުކޮށް ޔާމީން މިނިވަން ކުރުމުގެ މަސައްކަތް ފެށިއްޖެ ކަމަށް ބުނެ، ސަޕޯޓަރުން ގެންދަނީ އުފާ ފާޅުކުރަމުންނެވެ.
