ރިޔާސީ އިންތިހާބުގެ ވަގުތީ ނަތިޖާ އިއުލާން ކުރުމުގެ ކުރިން ބަލި ގަބޫލުފުޅު ކުރައްވައި ރައީސް ސޯލިހު މުއިއްޒަށް މަރުހަބާ ކިޔުމުން ގިނަ ބަޔަކު ރައީސް ސޯލިހަށް ތައުރީފުކުރައްވައި ވެރިންގެ ކިބައިގައި މޮޅުވުމާއި ބަލި ގަބޫލު ކުރުމުގެ ސިފަ ހުންނަންވާނެ ކަމަށް ބުނެފިއެވެ. ސިޔާސީ ފަރާތްތަކާއި ބައެއް އާއްމު ރައްޔިތުން ސޯސަލް މީޑިއާގައި އެގޮތަށް ހިޔާލު ފާޅުކުރަމުން ދިޔައީ މީގެ ކުރިން ރިޔާސީ އިންތިހާބުތަކުގައި ވޯޓު ގުނާ ނިމުމުން ކޯޓަށް މައްސަލަ ގެންގޮސް އިންތިހާބު ބާތިލު ކުރުމާއި، ވޯޓުގެ ކަންކަމާ ހިތްހަމަ ނުޖެހި ބަލި ގަބޫލު ކުރިކަމަށް އިއުލާން ކުރަން ފަސް ޖެހުނު މަންޒަރުތައް ފެނިފައި ހުރުމުންނެވެ. ބޮޑު ތަފާތަކުން ރައީސް ޔާމީން ބަލިކޮށް 2018 ގެ އިންތިހާބު ރައީސް ސޯލިހު ކާމިޔަބު ކުރެއްވި އިރު ބަލި ގަބޫލުނުކޮށް ޕީޕިއެމް މެމްބަރުންނާ އެކު ރައީސް ޔާމީން މުޒާހަރާވެސް ކުރެއްވިއެވެ. އެ ފަހަރު އިންތިހާބުގައި ފާހަގަ ތިރިއަށް ވެއްޓޭ ގަލަމެއްގެ ވާހަކައާއި އޭރުގެ އިލެކްޝަން ކޮމިޝަނުގެ ރައީސް ޝަރީފަށް ވަރަށް ބޮޑަށް ފާޑުކިޔަފައި މުޒާހަރާތައް ކުރިއެވެ.
މި އަހަރުގެ ރިޔާސީ އިންތިހާބު އަމާންއޮމާންކޮށް ނިމުނު އިރު ރައީސް ސޯލިހުގެ އެމްޑީޕީގެ ވެރިންނާއި ސަރުކާރުގެ އިސް ފަރާތްތަކުންވެސް ވަނީ މުއިއްޒަށް މަރުހަބާ ކިޔާފައެވެ. މުއިއްޒަށް މަރުހަބާ ދަންނަވައި ރައީސް ސޯލިހު ކުރެއްވި ޓުވީޓުގައި ވަނީ، އިންތިހާބުގައި ރައްޔިތުން ދެއްކެވި ޑިމޮކްރެޓިކް ރީތި ނަމޫނާއަށް ޝުކުރު ދަންނަވައިފަ އެވެ. އަދި އެކުގައި މަސައްކަތް ކުރެއްވި އެމްޑީޕީއާއި އަދާލަތު ޕާޓީގެ މެންބަރުންނަށާއި އެ މަނިކުފާނަށް ވޯޓު ދެއްވި ހުރިހާ ރައްޔިތުންނަށްވެސް ޝުކުރު އަދާކުރައްވާފައިވެއެވެ.
އިންތިހާބުގެ ދެވަނަ ބުރުގެ ވަގުތީ ނަތީޖާ ދައްކާ ގޮތުން، މުއިއްޒަށް ވަނީ 53 ޕަސެންޓާއެކު 126،850 އަށްވުރެ ގިނަ ވޯޓު ހޯއްދަވައިފައެވެ. ރައީސް ސޯލިހަށް ލިބިވަޑައިގެންނެވީ 46 ޕަސެންޓެވެ. އެއީ 108،696 އަށްވުރެ ގިނަ ވޯޓެވެ.
