ރައީސް ޔާމީންގެ ކެންޑިޑަސީއާމެދު އިލެކްޝަން ކޮމިޝަނުން ނިންމި ނިންމުން ބަލައި ނުގަނެ، އެ މައްސަލަ ސުޕްރީމް ކޯޓަށް ހުށަހެޅުމުގެ މަސައްކަތް ކުރަމުން އަންނަކަމަށް ޕީޕީއެމުން ބުނެފިއެވެ.
އެ ޕާޓީން ނެރުނު ނޫސް ބަޔާނުގައި ބުނެފައިވަނީ ޔާމީންގެ ކެންޑިޑެސީ ޤަބޫލުނުކުރުމަށް އެ ކޮމިޝަނުން ނިންމި ނިންމުމަކީ ޞައްޙަ ނިންމުމެއް ކަމަށް ޕީޕީއެމާއި ޕީއެންސީ ކޯލިޝަނުން ނުދެކޭ ކަމަށެވެ.
އިލެކްޝަންސް ކޮމިޝަންގެ ނިންމުން، އިންތިޚާބުތަކާބެހޭ ޢާންމު ޤާނޫނުގެ 21 ވަނަ މާއްދާގެ (ބ) ގައި ބަޔާންކޮށްފައިވާ ގޮތުގެ މަތިން، ސުޕްރީމް ކޯޓަށް ހުށަހެޅުމަށްޓަކައި ކުރަންޖެހޭ އެންމެހައި މަސައްކަތްތައް ރައީސް ޢަބްދުﷲ ޔާމީން ޢަބްދުލްޤައްޔޫމްގެ ވަކީލުންގެ ޓީމުން ކުރިއަށް ގެންދާ ކަމަށާއި، ސުޕްރީމް ކޯޓުން އިލެކްޝަންސް ކޮމިޝަންގެ ނިންމުން ބާޠިލުކޮށް، ރައީސް ޔާމީންގެ ކެންޑިޑަސީގެ ޞައްޙަކަން ކަށަވަރުވެގެން ދާނެކަމީ އެއްވެސް ޝައްކެއް އޮތްކަމެއް ނޫންކަމުގައި ޔަގީންކުރެވޭކަމަށެވެ.
ސުޕްރީމް ކޯޓަށް މި މައްސަލަ ހުށަހެޅުމުގެ ފުރުސަތު އޮންނާނީ އިލެކްޝަންސް ކޮމިޝަނަށް ކެންޑިޑެސީ ފޯމު ހުށަހަޅާތާ 48 ގަޑިއިރު ފަހުން، ފަސް ދުވަހުގެ ތެރޭގައެވެ. މި މައްސަލަ ސުޕްރީމް ކޯޓަށް ހުށަހަޅާތާ ހަތް ދުވަހުގެ ތެރޭގައި މި މައްސަލައާމެދު ގޮތެއް ނިންމަން ޤާނޫނުއަސާސީން ލާޒިމުކުރެއެވެ.
ޕީޕީއެމްގެ ފަރާތުން އަންނަ ރިޔާސީ އިންތިހާބުގައި ވާދަކުރުމަށް ރައީސް ޔާމީންގެ ކެންޑިޑެސީ ފޯމް ހުށައަޅާފައިވަނީ މިއަދުއެވެ. އެހެންނަމަވެސް ޖިނާއީ ކުށެއް ސާބިތުވެ، 12 މަސްދުވަހަށް ވުރެ ދިގު މުއްދަތެއްގެ ހުކުމެއް ރައީސް ޔާމީން ތަންފީޛުކުރައްވަމުން ގެންދަވާތީ، މި ހުކުމް ތަންފީޛުކޮށް ނިމިފައިނުވާކަން، ހުށަހަޅާފައިވާ ކުށުގެ ރެކޯޑަށް ބެލުމުން އެނގެން އޮންނާތީ، ޤާނޫނުއަސާސީގެ 109 ވަނަ މާއްދާގެ (ޅ) ގައި ބަޔާންކުރާ ޝަރުތު، ރައީސް ޔާމީންގެ ކިބައިގައި ފުރިހަމަނުވާކަމަށްބުނެ އެމަނިކުފާނުގެ ކެންޑިޑެސީ ބަލައިނުގަންނަން އިލެކްޝަންސް ކޮމިޝަނުން ވަނީ ނިންމައިފައެވެ.
