ކުރިއަށް އޮތް ރިޔާސީ އިންތިޚާބުގައި، ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ރިޔާސީ ޓިކެޓުގައި ވާދަކުރުމަށް ކުރީގެ ރައީސް، އަބްދުﷲ ޔާމީން ހުށައެޅި ކެންޑިޑެންސީ ފޯމު ބަލައިނުގަންނަން އިލެކްޝަންސް ކޮމިޝަން (އީސީން) ނިންމައިފިއެވެ.
ރައީސް ޔާމީންގެ ކެންޑިޑެސީ ބަލައިނުގަންނަން ނިންމާފައިވާކަން ސަބަބު އިލެކްޝަން ކޮމިޝަނުން މިހާރުވަނީ އާއްމުކޮށްފައެވެ. އަދި އެ ސަބަބުތައް ލިޔުމުން ޕީޕީއެމަށް ވެސް ވަނީ ފޮނުވާފައެވެ.
ރައީސް ޔާމީންގެ ކެންޑިޑަސީ ގަބޫލުނުކުރާކަން ހާމަކޮށް އިލެކްޝަނުން ބުނެފައިވަނީ ފޯމުގައިވާ މައުލޫމާތާއި ތަކެތި ބަލައި ޗެކްކުރިއިރު، ޤާނޫނު އަސާސީއާއި އިންތިޚާބުތަކާބެހޭ އާންމު ގާނޫނު އަދި ރިޔާސީ އިންތިޚާބުގެ ޤާނޫނުގައިވާ ގޮތުގެމަތިން، ރައީސް ޔާމީން، ރައީސުލްޖުމްހޫރިއްޔާކަމަށް ކުރިމަތިލައްވަން ހުށަހެޅި ހުށަހެޅުން، އެ ކޮމިޝަނުން ގަބޫލުކުރެވެން ކަމަށެވެ.
ކެންޑިޑެސީ ގަބޫލުނުކުރި ސަބަބެއްގެ ގޮތުގައި ބުނެފައިވަނީ، ޖިނާއީ ކުށެއް ސާބިތުވެ، 12 މަސްދުވަހަށް ވުރެ ދިގު މުއްދަތެއްގެ ހުކުމެއް ރައީސް ޔާމީން ތަންފީޛުކުރައްވަމުން ގެންދަވާތީ، މި ހުކުމް ތަންފީޛުކޮށް ނިމިފައިނުވާކަން، ހުށަހަޅާފައިވާ ކުށުގެ ރެކޯޑަށް ބެލުމުން އެނގެން އޮންނާތީ، ޤާނޫނުއަސާސީގެ 109 ވަނަ މާއްދާގެ (ޅ) ގައި ބަޔާންކުރާ ޝަރުތު، ރައީސް ޔާމީންގެ ކިބައިގައި ފުރިހަމަނުވާތީއެވެ.
އެއީ ވ. އާރަށް ކުއްޔަށްދޫކުރުމުގައި ހިންގާފައިވާ ހިޔާނާތާ ގުޅިގެން މިދިޔަ އަހަރުގެ ޑިސެމްބަރު މަހުގެ 25 ވަނަ ދުވަހު ކްރިމިނަލް ކޯޓުން ކޮށްފައިވާ ހުކުމުގެ ސަބަބުންނެވެ.
ރައީސް ޔާމީންގެ ފަރާތްޕުޅުން ކެންޑިޑެސީ ފޯމް ހުށަހެޅުމަށް އިލެކްޝަންސް ކޮމިޝަންގެ އިންތިހާބީ މަރުކަޒަށް ވަޑައިގެންނެވިއިރު އިސްކޮށް ހުންނެވީ ރައީސް ޔާމީންގެ ރަނިންމޭޓް، ކުރީގެ ނައިބު ރައީސް ޑރ. މުހައްމަދު ޖަމީލް އަހްމަދެވެ.
ގާނޫނީ ބޭފުޅުންނާއި ސިޔާސީ ފަރާތްތަކުން އަދި ޕީޕީއެމްގެ ވެރިންނަށްވެސް ޔާމީނުގެ ފޯމު ބަލައި ނުގަންނާނެކަން އިނގޭ މޭރުމުން ވަނީ މީގެ ކުރިން ވާހަކަ ދައްކާފައެެވެ. ނަމަވެސް މިއަދު އިންތިހާބުގެ ފޯމު ލާފައި ވަނީ ޕީޕީއެމް ގެ އާއްމު މެމްބަރުން ހިތްހަމަ ޖައްސާލައި، ޔާމީނު ނޫން ނަމެއް ޕީޕީއެމް ގެ ރިޔާސީ ކެންޑިޑޭޓަކަށް ނެރުމަށް ފަސޭހަ ކުރުމަށް ކަމަށްވެއެވެ.
