ރައީސުލްޖުމްހޫރިއްޔާ ޑރ.މުހައްމަދު މުއިއްޒުއާއި ’ވަރަށް ބޮޑަށް ގާތްވުމަށް‘ ސިހުރު ހެދި ކަމުގެ ތުހުމަތުގައި ހައްޔަރުކޮށްފައިވާ މީހުންގެ ބަންދަށް އަނެއްކާވެސް އިތުރު 7 ދުވަސް ޖަހައިފިއެވެ.
މި މައްސލާގައި ހައްޔަރުކޮށްފައިވަނީ ޝަމްނާޒު ސަލީމާއި އޭނަގެ ކޮއްކޮ ސަނާ ސަލީމުގެ އިތުރުން ސިހުރުވެރިއާކަމަށް ބުނާ ތ.ކިނބިދޫ ސަމީރެވެ. ޝަމްނާޒް ސަލީމަކީ ރައީސް ޑރ.މުހައްމަދު މުއިއްޒުގެ ވަރަށް އަރިސް ބޭފުޅެއް ކަމަށްވާ އާދަމް ރަމީޒުގެ ކުރީގެ އަނބި ކަނބަލުންނެވެ. ކުރިން ސިޓީ ކައުންސިލުގެ ހެންވޭރު ދެކުނު ދާއިރާހެ މެމްބަރުކަން އަދާ ކުރަމުންދިޔަ ޝަމްނާޒު ވަނީ މި ސަރުކާރު އިސް މަގާމުތަކެއްގައި މަސައްކަތްކޮށްފައެވެ. މި ގޮތުން ރައީސް ގެ ރަސްމީ ގެކޮޅު މުލިއާގޭގެ ސްޓޭޓް މިނިސްޓަރުކަމާއި އެންވަރމަންޓު މިނިސްޓްރީ ގެ ސްޓޭޓް މިނިސްޓަރުކަން އަދާކުރެއްވިއެވެ. ސިހުރުގެ ތުހުމަތުގައި ހައްޔަރުކުރި އިރު ޟަމްނާޒު ހުރީ އެންވަރމަންޓް މިނިސްޓްރީގެ ސްޓޭޓް މިނިސްޓަރުކަމުގެ މަގާމުގައެވެ. މި މައްސަލާގައި ހިމެނޭ ސަނާ ސަލީމު އަދާކުރަމުންއައީ އެންވަރމަންޓު މިނިސްޓްރީގެ ޕޮލިޓިކަލް ޑިރެކްޓަރުކަމުގެ މަގާމެވެ.
ސިހުރުގެ މައްސަލަ ޖެހުނު ހިސާބުން ރައީސް އޮފީހުގެ މިނިސްޓަރ އާދަމް ރަމީޒުވަނީ ޝަމްނާޒު ވަރިކޮށްފައެވެ. ޝަމްނާޒު ހައްޔަރުކުރުމުން އާދަމް ރަމީޒުވެސް ވަނީ ރައީސް އޮފީހުގެ މިނިސްޓަރުގެ މަގާމުން ސަސްޕެންޑު ކޮށްފައެވެ.
ރައީސަށް ސިހުރު ހެދި މައްސަލަވަނީ ބައިނަލްއަގުވާމީ މީޑިއާތަކުގެ ސަމާލުކަމަށްވެސް އައިއްސައެވެ. މި މައްސަލައިގެ އެއްވެސް ތަފްސީލެއް މިހާތަނަށް ޕޮލިހުން ހާމަކޮށްފައި ނުވެއެވެ.
