ފާނަ މަސްވެރިކަމުގައި ފީނަމުން ދިޔަ ބިދޭސީއެއްގެ ގައިގަ ލޯންޗަކުން ޖެހި ނިޔާ ވެއްޖެއެވެ.
އދ.ދަނގެތީ ކައިރި ތިލައެއްގައި ފާނަ މަސްވެރިކަމުގައި ފީނަމުންދިޔަ ބިދޭސީ މީހާގެ ގައިމަތިން ލޯންޗު ދިއުމުގެ ސަބަބުން އޭވަނީ ވަރަށް ބޮޑަށް ޒަހަމުވެފައެވެ. މަންޒަރު ދުއް މީހުން ބުނާ ގޮތުން ގާތްގަނޑަކަށް އޭނާ އޮތީ ދެބުރިވެފައެވެ. ފާނަ މަސްވެރިކަމުގައި އުޅުނު ދޯނި ފ.ފީއަލީ ’ޓްވިންސް‘ ދޯނިން އެ ސަރަހައްދުގައި ހަރަކާތްތެރިވަމުން ދިޔައީ ސަލަމާތީ ގޮތުން ބޭނުން ކުރަން ޖެހޭ ހުރިހާ ނިޝާނެއްވެސް ބޭނުން ކުރަމުންނެވެ. މި ގޮތުން އަޑީގައި މީހަކު ފީނަމުންދާ ނަމަ އެ ދިމާލުގެ މަތިން ފެންނަ ގޮތަށް ބަހައްޓަން ޖެހޭ ދިދަވެސް ހުރީ ބަހައްޓާފައެވެ. ސޯސަލް މީޑިއާގައި ދައުރުވަމުންދާ ފޮޓޯ ތަކުން ފެންނަ ގޮތުގައި ފީނަމުން ދިޔަ ސަރަހައްދުގައި ހުރީ ބަޔަކު އުޅޭ ކަމުގެ ނިޝާންތަކާއި އެމީހުން ގެންގުޅޭ އާލާތްތައްވެސް ފެންނަ ގޮތަށެވެ. އެ ތިލަ އަކީ އާއްމުކޮށް ކަނޑު ދަތުރުފަތުރުކުރާ އުޅަނދު ފަހަރު ދުއްވާ ތަނެއް ނޫން ކަމަށްވެއެވެ.
ބިދޭސީ މީހާގެ ގައިގަ ޖެހުނު ލޯންޗު ދުއްވަމުންދިޔަ ކެޕްޓަން ވަނީ މިހާރު ހައްޔަރުކޮށްފައެވެ. އެ ލޯންޗަކީ މާމިގިއްޔާއި މާލެއާއި ދެމެދު ފެރީ ދަތުރުކުރުމަށް ބޭނުންކުރާ ލޯންޗެކެވެ.
ދަނގެތީ ސިއްހީ މަރުކަޒުން ވާހަކަދެއްކި އޮފިޝަލަކަުވެސް ވިދާޅުވީ އޭނާ ގެނައިރުވެސް މަރުވެފައިވާ ކަމަށެވެ. ޕޮލިހުން އަންނަނީ މި މައްސަލަ މިހާރު ތަހުގީގު ކުރަމުންނެވެ.
