ކޮންމެ އަހަރެއްގެ ރޯދަމަހު ޝަލަބީގެ ފަރާތުން ގެނެސްދޭ މަދަހަ އަލްބަމް ސިލްސިލާގެ 4 ވަނަ އަލްބަމް ހިދާއީ ނޫރު 4 ނެރެފިއެވެ. މި އަލްބަމް ނެރެދެއްވީ އަދާލަތު ޕާޓީގެ ރައީސް އަދި މިނިސްޓަރ އޮފް ހޯމް އެފެއާޒް ޝެއިހް އިމްރާން އަބްދުﷲއެވެ.
ކޮވިޑް19 ގެ ހާލަތުގެ ސަބަބުން ވަރަށް ކުޑަ ރަސްމިއްޔާތެއްގައި ބޭއްވި މި ހަފްލާގައި މިނިސްޓަރވަނީ ޝަލަބީގެ މި މަސައްކަތަށް ވަރަށް ބޮޑަށް ތައުރީފުކޮށް ވާހަކަ ދައްކަވާފައެވެ. މި ގޮތުން މަދަހަ އާއި ޅެމުގެ ޒަރީއާއިން ކީރިތި ރަސޫލާއަށް ހަމްދާއި ޘަނާ ކިއުމާއި އަދި ހެޔޮ ނަސޭހަތްތައް ބުނެދިނުމުން މީހުންނަށް ފަސޭހައިން ފަހުމްވާ ކަމަށާއި، މުސްތަގްބަލުގައި ވެސް ޝަލަބީގެ ފަރާތުން އިތުރު ރީތި މަދަހަތަކެއް އަޑުއިވި އަދި އެހެން ކުދިންނަށް ބުނެދީ ކިޔަވައިދޭނެ ކަމަށް އުއްމީދުކުރާ ކަމަށް ވިދާޅުވިއެވެ. މީގެ އިތުރުން ކީރިތި ޤުރުއާންވެސް ވަރަށް ރީތިކޮށް ޝަލަބީ ކިޔަވާތީ އެކަމުގައިވެސް ގިނަ ކުދިންތަކަކަށް އުނގަންނައި ދިނުމުގެ މަސައްކަތްކޮށްދެއްވުމަށް މިނިސްޓަރ އެދިވަޑައިގެންނެވިއެވެ.
ކޮވިޑް ހާލަތުގެ ސަބަބުން 2020 ވަނަ އަހަރު މަދަހަ އަލްބަމް ގެނެސްދެވޭނެ ގޮތެއް ނުވުމާއެކު މި އަހަރުވެސް ކޮވިޑް19 ގެ ބަލިމަޑުކަމުގެ ސަބަބުން ވަރަށް ދަތި އުނދަގޫ ކޮތަކަށް މަސައްކަތްތައް ކުރަން ޖެހުމުން، ޝަލަބީ މި ފަހަރުގެ އަލްބަމް ރެކޯޑު ކުރީ ކ. ގާފަރުގައި ނިހާން ސްޓޫޑިއޯގައެވެ. އެހެން އަހަރު ތަކާ ހިލާފަށް މި ފަހަރުގެ މަދަހަ އަލްބަމުގައި ކުރިން މަދަހަ ކިއުމުގައި ރާއްޖޭގެ މަޝްހޫރު ފަންނާނުންނަށް ހާއްސަކޮށްގެން އެބޭފުޅުންގެ މަދަހަތަކެއް ޝަލަބީގެ އަޑުން ގެނެސްދީފައިވެއެވެ. އެގޮތުން މަރުހޫމް މުހައްމަދު ތައުފީގު (ހާޖަރާ ތައުފީގު) ގެ ”އޭ ސާހިބާ، އާއި އަބްދުﷲ ހަސަން (ހޮޅުދޫ އަބްދުﷲ) ގެ ”ރޯދައޭ..ރޯދައޭ“ އާއި ”އެމުނޭށިއޭ ރަންހާރުތައް“ އަދި ޝިފްނާގެ ”އީމާނޭ ހިތުގައި“ މި އަލްބަމުގައި ޝަލަބީގެ އަޑުން ގެނެސްދީފައިވެވެ. ޝަލަބީ ހާމަކުރި ގޮތުގައި މިއީ އެފަރާތްތަކުގެ އަގު ވަޒަންކޮށް، ހަނދާންތައް އާކުރުމަށް ކުރި ކަމެއް ކަމަށާއި މުސްތަގުބަލުގައި ވެސް މި ފަދަ ހިދުމަތްތެރި ހުނަރުވެރިންގެ އަގު މި ފަދަ ގޮތަކަށް، ޓްރިބިއުޓެއްގެ ގޮތަށް ވިޔަސް ގެނެސްދޭނެ ކަމަށެވެ.
މި ފަހަރުގެ އަލްބަމްގައި އަމިއްލަ ރާގުގެ މަދަހަތަކާއި އަދި ޝަލަބީއާއި އެކު އަބްދުﷲ ފަރީދު އަދި ނިހާން ބައިވެރިވެފައިވެއެވެ. މަދަހަ ރެކޯޑުކުރުމާއި އެހެނިހެން ކަންކަމުގައި ވެސް މި ދެފަރާތުގެ އެހީތެރިކަން ވަރަށް ބޮޑަށް ލިބުނު ކަމަށް ޝުކުރުވެރި ކަމާއެކު ޝަލަބީ ފާހަގަކުރިއެވެ. މީގެ އިތުރުން މި ފަހަރުގެ މަދަހަ އަލްބަމު ނެރެފައިވަނީ އަރިސް ބޮޑުބެރު ގުރޫޕުގެ ހެޔޮއެދުންތަކާއެކުގައެވެ.
