ރާއްޖޭގައި އެންމެ ފުޅާ ދައިރާއެއްގައި ދުންފަތުގެ ބާވަތްތައް ވިއްކާ ރޫޓު ފިހާރައިން، ސިނގިރޭޓުގެ ބައެއް ބާވަތްތައް އަނެއްކާވެސް އަގުބޮޑުކޮށްފިއެވެ. މިގޮތުން ކުރިން ސިނގިރޭޓު ވިއްކި އަގަށްވުރެ 45 ރުފިޔާ ވަނީ ކާޓޫނަކުން ބޮޑުކޮށްފައެވެ. ސިނގިރޭޓު އަގުބޮޑު ކުރި ސަބަބެއް ސީދާ އެ ކުންފުނިން ހާމައެއް ނުކުރެއެވެ. ނަމަވެސް އެ ފަރާތުން ފޮނުވި މެސެޖުގައި ކެމަލް ބްރޭންޑުގެ ސިނގިރޭޓާއި މެވިއަސް އިން 45 ރުފިޔާ މިއަދުން ފެށިގެން ބޮޑުވި ވާހަކަ ބަޔާންކޮށްފައިވެއެވެ.
ދުންފަތުގެ ބާވަތްތައް ރާއްޖެއަށް އެތެރެކުރާ އެހެން ކުންފުނިތަކުން ސިނގިރޭޓު އަގުތައް ހުރީ ކުރިންވެސް ވިއްކި އަގުގައެވެ. އެފަރާތްތަކަށް މިއަދު ގުޅުމުން ބުނީ އެ ފަރާތްތަކުން ވިއްކާ ބްރޭންޑްތަކުން އަގުބޮޑުނުކުރާ ކަމަށެވެ.
ރޫޓު ފިހާރައިން ކުއްލިއަކަށް ސިނގިރޭޓު އަގުބޮޑު ކުރި ސަބަބެއް ނޭންގުނަސް، ސިނގިރޭޓުގެ ޑިއުޓީއަށް އެއްވެސް ބަދަލެއް މި އަހަރު އައިސްފައިނުވެއެވެ. އެންމެ ފަހުން ސިނގިރޭޓު އަގުބޮޑުކޮށްފައިވަނީ 2020 ވަނަ އަހަރު ރައްޔިތުންގެ މަޖުލީހުން ފާސްކުރި ’އިމްޕޯޓު ޑިއުޓީގެ‘ ބިލުން ސިނގިރޭޓުން ނަގާ ޑިއުޓީ ބޮޑުކުރަން ފާސްކުރުމާ ގުޅިގެންނެވެ.
