އިނގިރޭސި ވިލާތުގައި ދިރިއުޅޭ ދިވެހިންނާއި އެ ގައުމަށް ދަތުރުކުރާ ދިވެހިން ސަމާލުވުމަށް ރާއްޖޭގެ ފޮރިން މިނިސްޓްރީން އިލްތިމާސްކޮށްފިއެވެ.
ފޮރިން މިނިސްޓްރީން މި އިލްތިމާސްކޮށްފައިވަނީ މި ދުވަސްވަރު އިނގިރޭސިވިލާތުގައި މުސްލިމުންނާ ދެކޮޅަށް މުޒާހަރާކޮށް، މުސްލިމުން ދިރިއުޅޭ ސަރަހައްދު ތަކުގައި ހަމަނުޖެހުން ހިންގަމުންދާތީއެވެ.
ފޮރިން މިނިސްޓްރީން ނެރުނު ބަޔާނުގައި ބުނެފައިވަނީ އިނގިރޭސިވިލާތުގެ ހުޅަނގު އުތުރުގައި ހިމެނޭ ސައުތްޕޯޓުގައި ކުޑަކުދިންގެ ޑާންސް އަދި ޔޯގާ ކްލާހަކަށް ވަޅިން ހަމަލާދިނުމުގެ ހާދިސާގައި ތިން ކުޑަކުދިން ނިޔާވުމާ ގުޅިގެން، މުސްލިމުންނާ ދެކޮޅަށް ސިލްސިލާ މުޒާހަރާތަކާއި ހަރަކާތްތައް ހިންގަމުން އަންނަ ކަމަށެވެ.
އެ މައްސަލަ، އިނގިރޭސިވިލާތުގައި ހުންނަ ދިވެހިރާއްޖޭގެ ހައިކޮމިޝަނުން ވަރަށް ގާތުން ބަލަމުން އަންނަކަމަށް މިނިސްޓްރީން ބުނެއެވެ. އެ ހާލަތާ ގުޅިގެން، އިނގިރޭސިވިލާތުގައި ދިރިއުޅޭ ދިވެހިންނާއި އެގައުމަށް ދަތުރުކުރާ ދިވެހިން، ވަކިން ހާއްސަކޮށް ސައުތްޕޯޓް އަދި އެތާގެ ވަށައިގެންވާ ސަރަހައްދުތަކުގައި ދިރިއުޅޭ މީހުން،އިތުރަށް ސަމާލުވުމަށް މިނިސްޓްރީން ވަނީ އިލްތިމާސްކޮށްފައެވެ.
މިނިސްޓރީއިން ނެރެފައިވާ ބަޔާނުގައި އިތުރަށް ބުނެފައި ވަނީ މިނިސްޓްރީގެ އެދުމަކީ އެންމެން ވެސް އިންތިހާއަށް ފަރުވާތެރިވެ، އަބަދުވެސް އެންމެ ފަހުގެ މައުލޫމާތު ހޯދަމުން ދިއުން ކަމަށާއި އަމިއްލަ ރައްކާތެރިކަމަށް އިސްކަންދިނުން ކަމަށެވެ.
މީގެ އިތުރުން، އަމަންއަމާންކަން ގެއްލިފައިވާ ސަރަހައްދުތަކާ ދުރުވެ، އެ ސަރަހައްދުގެ ކަމާބެހޭ އިދާރާތަކުން ދޭ އެންމެހައި އިރުޝާދުތަކަށް ފުރިހަމައަށް ތަބާވުމަށް މިނިސްޓްރީއިން ވަނީ އިލްތިމާސް ކޮށްފައެވެ. އަދި އެ ހަމަނުޖެހުންތަކާ ގުޅިގެން އެއްވެސް ބާވަތެއްގެ ކޮންސިއުލާ އެހީތެރިކަމެއް ބޭނުންވެއްޖެ ހިނދެއްގައި، އިނގިރޭސިވިލާތުގައި ހުންނަ ދިވެހިރާއްޖޭގެ ހައިކޮމިޝަނާ ގުޅުމަށް މިނިސްޓްރީން ވަނީ އެދިފައެވެ.
މިނިސްޓްރީން އެދިފައިވަނީ ހައިކޮމިޝަންގެ ނަމްބަރު (44)02072242135 އަށް ގުޅުމަށް ނުވަތަ އީމެއިލް އެޑްރެސް info@maldiveshighcommission.org އަށް މެއިލް ކުރުމަށެވެ.
