ސަލްޓަންޕާކުން ކޮނުނު ފަސްފުންޏަކުން ފެނުނު ރިހި ފައިސާފޮތިތައް ގެއްލުނީ ފަސްފުންޏާވެސް އެކީގަ!

ސަލްޓަން ޕާކު ތަރައްގީ ކުރުމުގެ މަސައްކަތް ކުރަނިކޮށް ފެނުނު އާސާރި ފައިސާފޮތިތަކެއް ގެއްލިފައިވާކަން ހާމަވެއްޖެއެވެ.

ރައްޔިތުންގެ މަޖުލީހުގެ މެމްބަރުން މިނިސްޓަރުންނާ ކުރަން ފޮނުވާފައިވާ ސުވާލުތަކުގެ ތެރެއިން މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑޭ) ލިޔުމުން ހުށަހެޅުއްވި ސުވާލުގެ ޖަވާބު ގައި ކުރީ ސަރުކާރުގެ ހެރިޓޭޖް މިނިސްޓަރ ޔުމްނާ މައުމޫން މިއަދު ލިއުމުން ފޮނުވި ޖަވާބުގައި ވިދާޅުވެފައިވަނީ 2017 ވަނަ އަހަރު ސަލްޓަން ޕާކު ތަރައްގީ ކުރުމުގެ މަސައްކަތް ކުރަމުންދިޔައިރު ކޮނުނު ވަޅެއްގެ ތެރެއިންނާއި އެ ވަޅުން ނެގި ފަސް ފުނީގެ ތެރެއިން އަސާރީ ފައިސާ ފޮތިތަކެއް ފެނިފައިވާ ކަމަށެވެ. އެކަން އެނގީ ސަލްޓަން ޕާކު ތަރައްގީ ކުރަމުންދިޔަ އެމްއެންޑީއެފުން ކަމަށެވެ.

ލިލީ މަގާ ދިމާލުން ސަލްޓާން ޕާކް ކައިރިން ރިހި ފައިސާ ފޮތިތަކާއި، މުށި ސީނުތަށިތަކާއި، ގުޅީގެ ބައިތަކެއް ފެނިފައިވާކަމަށް އެމްއެންޑީއެފްއިން އޭރުގެ ޑިޕާޓްމަންޓް އޮފް ހެރިޓޭޖްއަށް އަންގާފައިވާ ކަމަށެވެ. އެހެން ކަމުން ހެރިޓޭޖް ޑިޕާޓްމަންޓުގެ ޓީމެއް ސަލްޓަން ޕާކަށް ގޮސް ބެލިކަމަށް ޔުމްނާ ވިދާޅުވި އެވެ. އަދި ފަސް ފުނިން ފުރާނައިގެން އިރުއޮއްސުމާ ހަމައަށް 96 ފައިސާ ފޮތި ފެނުނު ކަމަށާއި، އިތުރަށް ފެނިދާނެ ކަމަށް ބަލައި ޖެހިގެން އައި ދުވަހު ދިޔައިރު ފަސްފުނިވެސް ވަނީ ގެއްލިފައެވެ.

ސަލްޓަން ޕާކުގެ މަސައްކަތް ކުރަމުންދިޔަ ދުވަސްވަރު ފެނުނު ރިހި ފައިސާ ފޮތިތަކެއް ގެއްލުނު ވާހަކަ އެ ދުވަސްވަރު ވަރަށް ބޮޑަށް ދެކެވުނެވެ. މިކަން ހިނގާފައި ވަނީ ޔުމްނާ މައުމޫން މިނިސްޓަރުކަމާ ހަވާލުވުމުގެ ކުރިން، އޭގެ ކުރީ ސަރުކާރުގެ ތެރޭގައެވެ.

އޭގެ އިތުރުން އޮކްޓޯބަރު 18، 2017 ގައި އެމްއެންޑީއެފްއިން 43 ފައިސާ ފޮތި ހެރިޓޭޖު ޑިޕާޓްމަންޓާ ހަވާލުކޮށްފައިވާ ކަމަށާއި، މިވަގުތު ޖުމްލަ 139 ފައިސާ ފޮތި ދާރުލްއާސާރުގައި އޮތްކަމަށް ޔުމްނާ ވިދާޅުވި އެވެ.

އަދި ޖުލައި 19, 2017 ގައި 713 ސީނު ތަށި، ގުޅިއެއްގެ ބައިތަކަކާއި ލޯ ތާހެއް ވެސް ދާރުލްއާސާރަށް ލިބިފައިވާ ކަމަށް، ދާރުލްއާސާރާ ހަވާލާ ދީ ޔުމްނާ ވިދާޅުވި އެވެ.

މަޖުލިސް މެމްބަރުންނަށް ފޮނުވާފައިވާ ސުވާލު ތަަކަކީ ކުރީސަރުކާރުގައި މިނިސްޓަރުންނަށް ކުރަން ބޭނުންވި ސުވާލުތަކެއް ކަމަށްވިޔަސް މަޖުލީހުގެ ރިޔާސަތު ބެލެހެއްޓެވި މުހައްމަދު ނަޝީދު އިސްތިއުފާދެއްވުމާ ހަމައަށް މި ސުވާލުތައް ވަނީ މެމްބަރުންނާ ހަމައަށް ގެނެސް ނުދެއްވާފައެވެ. މި ގޮތުން 50 އަށް ވުރެ ގިނަ ސުވާލާއި މައުލޫމާތު ސާފުކުރުމަށް މިނސިްޓަރުންނަށް ފޮނުވައި މަޖުލީހަށް ޖަވާބު ލިބިފައިވެއެވެ. މަޖުލީހުގެ މިހާރުގެ ރައީސް މުހައްމަދު އަސްލަމް ވިދާޅުވީ ކުރިން ޖަވާބު ލިބިފައިވާ ސުވާލުތައް ކޮންމެ ދުވަހަކު އިދާރީ މޭޒުން މަޖުލީހުގެ މެމްބަރުންނަށް އިއްވަމުން ގެންދަވާނެ ކަމަށެވެ.