އެމްޑަބްލިއު އެސްސީ ގެ މެނޭޖިންގ ޑިރެކްޓަރ ހަސަން ޝާހު ވެސް ރައީސް އިބްރާހިމް މުހައްމަދު ސޯލިހަށް ތާއިދުކުރަން ނިންމަވައިފިއެވެ. މި ފަހަރުގެ ރިޔާސީ އިންތިހާބުގައި ވެރިކަންކުރާ ކޯލިޝަނާ ނުލައި ޖޭޕީ އިސްވެ އޮވެ ރައީސް ކަމަށް ކުރިމަތިލާފައިވާ ގާސިމް އިބްރާހިމް ގެ ޖޭޕީގެ ސްލޮޓެއްގައި ހުންނެވި ޝާހު ޖޭޕީ އަށް ފޮނުވި ސިޓީގައި ބުނެފައިވަނީ ”ރައީސް އިބްރާހިމް މުހައްމަދު ސޯލިހުގެ ރިޔާސީ ދައުރުގައި ދައްކަވައި ދެއްވާފައިވަނީ ގައުމުގެ ހަމަޖެހުމާ، އަސާސީ ހިދުމަތް ފޯރުކޮށްދިނުމާ، ތަރައްގީއެވެ. ވީމާ 2023 ވަނަ އަހަރުގެ ރިޔާސި އިންތިހާބުގައި އެމަނިކުފާނަށް އަޅުގަނޑު ތާއިދު ކުރާތީ ތިޔަ ޕާޓީގެ ކައުންސިލް މެމްބަރުކަމުން އަޅުގަނޑު އިސްތިއުފާ ދީފީމެވެ. އަދި ޖޭޕީގެ ދަފްތަރުން އަޅުގަނޑުގެ ނަން އުނިކޮށްދެއްވުން އެދި އިހުތިރާމާއި އެކު ދެންނެވީމެވެ.“
ހަސަންޝާހު މީގެ ކުރިން އެމްޑީޕީގެ އިސް މަގާމުތަކެއްވެސް ފުރުއްވިއެވެ. އޭގެ ތެރޭގައި ޕާޓީގެ ރަޖިސްޓްރަރ ގެ މަގާމު ވެސް ހިމެނެއެވެ.
ހަޔަރ އެޑިކޭޝަން މިނިސްޓްރީ ގެ ނައިބު އައިމިނަތު މުހައްމަދު ސަލީމް (ސޯނީ) ވެސް ވަނީ ޖުމްހޫރީ ޕާޓީން ވަކިވެ، ރައީސް އިބްރާހިމް މުހައްމަދު ސޯލިހުއަށް ތާއިދު ކުރަން ނިންމަވާފައެވެ. ސޯސަލް މީޑިއާގައި ހާމަކޮށްފައިވާ ސިޓީގައި ރައީސް ސޯލިހަށް ދެވަނަ ދައުރެއް ދޭން ޖެހޭ ސަބަބުތައް ބަޔާން ކުރައްވާފައިވެއެވެ. އަދި އެ މަނިކުފާނުގެ ވެރިކަމަކީ މިހާތަނަށް ފެނުނު އެންމެ އަމާން އޮމާން ވެރިކަމަށް ވެފައި ތައުލީމީ ޖީލެއް ބިނާކުރަން އެމަނިކުފާނު ކުރައްވަމުން ގެންދަވާ މަސައްކަތްތަކަށް ތައުރީފުކުރައްވާފައިވެއެވެ.
އެމްޓީސީސީ ގެ މެނޭޖިން ޑިރެކްޓަރ އާދަމް އާޒިމްއާއި، އެމްޑަބްލީއު އެސްސީ ގެ މެނޭޖިންގ ޑިރެކްޓަރ ހަސަން ޝާހު އަދި ހަޔަރ އެޑިއުކޭޝަން މިނިސްޓަރ ގެ ނައިބު ސޯނީ ގެ އިތުރުން މިނިސްޓްރީ އޮފް އާރޓްސް، ކަލްޗަރ އެން ޑް ހެރިޓޭޖް ގެ ސްޓޭޓް މިނިސްޓަރ ވަލީދާ ގެ އިތުރުންވެސް ޖުމްހޫރީ ޕާޓީގެ ސްލޮޓުތަކުގައި (ސަރުކާރުގެ މަގާމުތަކުގައި ތިބި) ބައެއް ފަރާތްތަކުން ވަނީ ރައީސަށް ތާއިދުކުރަން ނިންމާ، ޖުމްހޫރީ ޕާޓީން ވަކިވެފައެވެ.




