ދުނިޔޭގެ ކަނޑުތަކުގެ ދުވަހާއި ގުޅުވައިގެން،ކަނޑު ރޯދި އުފާގެ ނަމުގައި ފެސްޓިވަލެއް ބޭއްވުމަށް މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްއިން ނިންމައި، މިފެސްޓިވަލުގައި ބައިވެރި ވުމުގެ ފުރުސަތު ހުޅުވާލައިފިއެވެ.
އެ މިނިސްޓްރީއިން ގެޒެޓުގައި ކުރި ޢިޢުލާނުގައި ބުނެފައިވަނީ ޖޫންމަހުގެ 8 ވަނަ ދުވަހު ބޭއްވުމަށް ހަމޖެހިފައިވާ، މިއަހަރުގެ ދުނިޔޭގެ ކަނޑު ތަކުގެ ދުވަސް ފާހަގަ ކުރުމުގެ ގޮތުން ހިންގުމަށް ހަމަޖެހިފައިވާ ”ކަނޑު ރޯދި އުފާ“ ފެސްޓިވަލް ގައި ބައިވެރިވުމަށް އެދިލައްވާ ފަރާތްތަކުން 30 މެއި 2024 ވަނަ ދުވަހުގެ 11:00 ގެ ކުރިން ނަން ހުށައެޅުމަށްށެވެ.
މި ފެސްޓިވަލްގެ މައިގަނޑު ބޭނުމަކީ އުފާވެރި މާހައުލަކުން ކުޑަކުދިން އަދި ޒުވާނުންނަށް ކަނޑާ ގުޅުން ހުރި މަޢުލޫމާތު ދިނުން ކަމުގައި ޢިއުލާނުގައި ހާމަކޮށްފައިވެއެވެ. އަދި މި ފެސްޓިވަލް ތެރެއިން ކުޅިވަރުތަކާއި އެހެނިހެން ހަރަކާތްތައް ބޭއްވުމަށްވެސްވަނީ ހަމަޖެހިފައެވެ.
ރާއްޖޭގެ އެކި ކަންކޮޅުތަކުގައިވެސް މިފެސްޓިވަލާއި ގުޅުންހުރި ހަރަކާތްތައް ކުލަގަދަ ގޮތެއްގައި ކުރިއަށް ގެއްދިއުމަށް ވެސް އެމިނިސްޓްރީން ވަނީ ނިންމާފައެވެ. އެގޮތުން ކޮންމެ ރަށެއްގައިވެސް މޫދުގެ ހަރަކާތްތަކެއް ހިންގުމަށް ރަށު ކައުންސިލްތަކާއި މުއައްސަސާތަކާ ގުޅިގެން މަސައްކަތްކުރަމުން ދާކަމަށް އެ ވުޒާރާއިން ވަނީ ހާމަކޮށްފައެވެ.
ކަނޑުތަކުގެ ދުވަހާ ގުޅިގެން ރާއްޖޭގެ ހުރިހާ ސުކޫލަކަށް ހުޅުވާލައިގެން މަޒުމޫނު ލިޔުމުގެ މުބާރާތަކާއި ކުރެހުމުގެ މުބާރާތެއް ބޭއްވުމަށްވެސް ވަނީ ނިންމާފަ އެވެ. އަދި މި މުބާރާތްތަކުން ވަނަތައް ހޮވައި އިނާމު ދިނުމަށްވެސްހަމަޖެހިފައިވެއެވެ. މިނިސްޓްރީގެ ސޯޝަލް މީޑިއާ ޕްލެޓްފޯމް މެދުވެރިކޮށް މުޅި ރާއްޖެއަށް ކުއިޒް މުބާރާތެއް ބޭއްވުމަށްވެސް ވަނީ ވަނީ ނިންމާފައެވެ.
ކަނޑުތަކުގެ ދުވަހެއް އެންމެ ފުރަތަމަ ފާހަގަ ކުރެވުނީ 1992 ވަނަ އަހަރުއެވެ. ދުނިޔޭގެ ކަނޑުތަކުގެ ދުވަހުގެ މިފަހަރުގެ ޝިޢާރަކީ ”ކެޓެލައިޒިން އެކްޝަން ފޮރ އަވަރ އޯޝަން އެންޑް ކްލައިމެޓް”އެވެ. ދުނިޔޭގެ ކަނޑުތަކުގެ ދުވަހުގެ ގޮތުގައި ފާހަގަ ކުރާ ދުވަހަކީ ޖޫން މަހުގެ 8 ވަނަ ދުވަހެވެ.
