އިޒްރޭލުން ފަލަސްތީނުގައި ހިންގަމުންދާ ގަތުލުއާންމުގައި ގައްޒާގެ ރަފާ ސަރަހައްދުގައި ހިންގަމުންދާ ލާއިންސާނީ އަމަލުތައް ހުއްޓާލުމަށް އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން ކޮށްފައިވާ އަމުރު ތަންފީޒު ކުރުމަށް ބައިނަލް އަޤްވާމީ ހުރިހާ އިދާރާތަކަށް މޯލްޑިވިއަން ޑިމޮކުރަޓިކް ޕާރޓީ އެމްޑީފީން ގޮވާލައިފިއެވެ.
އިޒްރޭލާ ދެކޮޅަށް އައިސީޖޭ އަށް މައްސަލަ ހުށަހެށައަޅާފައިވަނީ ދެކުނު އެފްރިކާއިންނެވެ. މި މައްސަލައިގައި އެދިފައިވަނީ ގައްޒާއަށް އިޒްރޭލުން ދެމުންދާ އިންސާނިއްޔަތާއި ޙިލާފު ހަމަލާތައް ވަގުތުން ހުއްޓާލުމަށާއި އިޒްރޭލު ސިފައިން ރަފާއަށް އެރުން ހުއްޓާލުމަށާއި އަދި އިންސާނީ އެހީ ޣައްޒާއަށް ވެއްދުމުގެ އަމުރެއް ނެރެދިނުމަށްށެވެ.
ފަލަސްތީނުގެ ރައްޔިތުންގެ ނަސްލު ނައްތާލުމަށް އިޒްރޭލުން ޒަމާނުއްސުރެ ބައިނަލްއަގްވާމީ ގާނޫނުތަކާއި ހިލާފަށް ހިންގަމުންދާ ޢަމަލުތައް ވަރަށް ބޮޑަށް ކުށްވެރިކުރައްވާ އެމްޑީޕީން ނެރުނު ބަޔާނުގައި ބުނެފައިވަނީ އިޒްރޭލުން ބައިނަލްއަޤްވާމީ ޤާނޫނުތަކަށް އިޚްތިރާމު ނުކުރުމަކީ މުޅި އެ ސަރަހައްދާއި އެއަށްވުރެ ދުރަށްވެސް ސަލާމަތަށް ނުރައްކާވާނެ ކަމެއް ކަމަށްށެވެ.
މީގެ އިތުރުން ފަލަސްތީން ރައްޔިތުންގެ ހައްގުތަކަށް އަޅާނުލެވި އޮންނަތާ އެތައް އަހަރުތަކެއް ވެއްޖެ ކަމަށާއި، ޤައުމުތަކާއި ބައިނަލްއަގްވާމީ ޖަމިއްޔާތަކުން އައިސީޖޭގެ އަމުރުގެ ބޭނުން ހިފައިގެން އިޒްރޭލުން ކުށްވެރިކޮށް އެ އަމުރު ތަންފީޒުކުރަން ގުޅިގެން މަސައްކަތް ކުރަންޖެހޭ ކަމަށްވެސް ބަޔާނުގައިވެ ހާމަކޮށްފައިވެއެވެ.
އައިސީޖޭއިން ގައްޒާގައި ހާލުގައި ޖެހިފައި ތިބި ފަލަސްތީނުގެ ލޮބުވެތި އަޚުންނާއި އުޚްތުންނަށް ބޭނުންވާ އިންސާނީ އެހީތެރިކަން ވަގުތުން ވަގުތަށް ފޯރުކޮށްދިނުމަށް އަމުރުކޮށްފައިވާއިރު އެ އެންގުމަށް ވެސް ބައިނަލްއަގްވާމީ މުޖުތަމައުއިން ފުރިހަމައަށް އަމަލުކުރުމަށް އެމްޑީޕީގެ ޤަރާރުގައި ގޮވާލާފައިވެެއެވެ.
