މަޤާމުތަކަށް މީހުން އައްޔަން ކޮށް ވަކި ކުރަނީ ރައީސުލް ޖުމްހޫރިއްޔާއަށް އެބާރުވެރިކަން ލިބިދީފައިވާތީކަމަށް ރައީސުލް ޖުމްހޫރިއްޔާގެ ޗީޕް ސްޕޯކްސް ޕާސަން ހީނާ ވަލީދު ވިދާޅުވެއްޖެއެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި، މި ހަފްތާގެ ތެރޭގައި ސަރުކާރުގެ ބައެއް މަޤާމުތަކުން އަދި ހާއްސަކޮށް ސިޔާސީ މަޤާމުތަކުގައި ތިއްބެވި ބޭފުޅުން މަޤާމް ތަކުން ވަކި ކުރެއްވި ކީއްވެގެންތޯ ނޫސް ވެރިއަކު ސުވާލު ކުރުމުން ،ރައީސުލް ޖުމްހޫރިއްޔާގެ ޗީފް ސްޕޯރކްސް ޕާރސަން ވިދާޅުވީ ރައީސުލް ޖުމްހޫރިއްޔާ ސަރުކާރު ހިންގެވުމުގައި އެމަނިކުފާނަށް ފަސޭހަފުޅުވާގޮތަށް ނުވަތަ ކަންކަން ބައްޓަން ކުރެއްވުމަށް އެމަނިކުފާނަށް ބާރުރުލިބިގެންވާކަމަށްށާއި ކުންފުނިތަކަށް މީހުން އައްޔަން ކުރުމާއި ބަދަލުކުރުމާއި ވުޒާރާތަކަށް މީހުން އައްޔަން ކުރުމާއި އެގޮތުގެ މަތިން ސަރުކާރު ހިންގުމުގައި އެމަނިކުފާނަށް ބޭނުންފުޅުވާ ކަންކަން ފަސޭހަ ކުރުމަށްޓަކައި ނުވަތަ އިތުރަށް ހަރުދަނާ ކުރުމަށްޓަކައި ކުރައްވަން ޖެހޭ ކަންކަން ރައީސް އަބަދުވެސް ކުރައްވަމުން ގެންދަވާކަމަށް ހީނާ ވިދާޅުވިއެވެ.
ކޮރަޕްޝަންގެ ތުހުމަތުތަކެއްގެ އިނގިލި ދިއްކުރެވެމުން ދަނިކޮށް އެމް އެމް ޕީ އަރުސީގެ މެނޭޖިންގ ޑިރެކްޓަރ ފާތިމަތު ތަޢުފީޤު ( ކުޑީ) އަދި މިޕްކޯގެ މެނޭޖިންގ ޑިރެކްޓަރ އަހްމަދު ސަމާހު ރަޝީދުވެސް ވަނީ އިއްޔެގެ ވަގުތެއްގައި މަޤާމުން ވަކިކޮށްފައެވެ.
އެޗް ޑީ ސީ ގައި ވެސް ކޮރަޕްޝަންގެ މައްސަލަތައް ހިމެނޭ ވާހަކަތަކާއި ނުއަގުގައި ބިން ވިއްކުންފަދަ މުޢާމަލާތްތައް ހިނގާފައިވާ ކަމުގެ ވާހަކަ ދެކެވޭ ކަމަށްށާއި، މީގެ އެއްވެސް ޝަކުވާއެއް ރައީސުލް ޖުމުހޫރިއްޔާއާއި ހަމައަށް އައިސްފައިވޭތޯ ސުވާލު ކުރުމުން މިސުވާލަށް ސީދާ ޖަވާބެއް ދެއްވާފައެއް ނުވެއެވެ.
ނަމަވެސް ހުރިހާ ނޫސްވެރިންގެ ސުވާލުތަކަށް ޖަވާބު ދެއްވުމަށްޓަކައި އަންނަ ހަފްތާގައި އިތުރު ނޫސް ކޮންފަރެންސެއް ބާއްވަވާނެ ކަމަށް ހީނާ ވިދާޅުވިއެވެ.
އާސަރުކާރަށް 6 މަސް ވެފައިވާއިރު މަޤާމުތަކަށް ގިނަ މީހުން އައްޔަން ކުރުމާއި މަޤާމް ތަކުގައި ތިބި މީހުން މަޤާމްތަކުން ވަކި ކުރަމުންދާތީ ވަރަށް ގިނަ ބައެއްގެ ފާޑުކިޔުން ދަނީ ސަރުކާރަށް އަމާޒުވަމުންނެވެ. ނާޤާބިލް މީހުން ތަންތަނަށް އައްޔަން ނުކުރުމަށްށާއި ކަމާއި ގުޅޭ ޢިލްމީ ޤާބިލް މީހުން މަޤާމުތަކަށް އިސްކުރުމަކީ ރައްޔިތުންނަށް އެންމެ ފައިދާ ބޮޑު ގޮތްކަމަށްވެސް ރައްޔިތުންދަނީ ބުނަމުންނެވެ.
