ބީ އެމްއެލްގެ ޑިރެކްޓަރުންގެ ބޯޑުގެ ޗެއާ ޕާސަންގެ މަޤާމުގައި ހުންނެވި ހަސަން ޒަރީރު އެމަޤާމުން އިސްތިއުފާ ދެއްވައިފިއެވެ.
އޭނާ މިމަޤާމަށް އައްޔަން ކޮށްފައިވަނީ މާރޗް 25 ،2024 ގައެވެ.
ޒަރީރުގެ އިސްތިއުފާއާއި ގުޅިިގެން ބީއެމްއެލް އިން ބުނެފައިވަނީ، ބީއެމްއެލްގައި މަސައްކަތް ކުރެއްވި ދުވަސްތަކުގައި ޒަރީރުގެ ކިބައިން ފެނުނު ހަރުދަނާ ލީޑަރޝިޕާއި ދެއްވި އަގުހުރި ލަފަޔާއި އިރުޝާދުތަކަށްޓަކައި ޝުކުރު ދަންނަވާކަމަށްށާއި ކުރިއަށް ދުވަސްތަކުގައިވެސް އިތުރު ކާމިޔާބީއަށް އެދޭ ކަމަށްށެވެ.
ޒަރީރު ބީ އެމްއެލް އިން އިސްތިއުފާ ދެއްވާފައިމިވަނީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް ރައްޔިތުންގެ މަޖިލީހުން އޭނާއަށް ރުހުން ދީފައި ވަނިކޮށެވެ.
ބޭންކު ހިންގާގަވާއިދުގައިވާ ގޮތުން އެ ބޭންކުގެ ބޯޑު އެކުލެވިގެންވަނީ ޖުމުލަ 11 މެންބަރުންގެ މައްޗަށްށެވެ. އެއީ ސަރުކާރުން އައްޔަންކުރާ އަށް މެންބަރުންނާއި އާންމު ހިއްސާދާރުންގެ ފަރާތުންހޮވާ ތިންމެންބަރުންނެވެ.
ބީއެމްއެލް އިން ހާމަ ކުރައްވާ ގޮތުގައި އެ ބޭންކުގައި މިވަގުތު ތިއްބެވީ ޖުމުލަ ނުވަ ޑައިރެކްޓަރުންނެވެ. ސަރުކާރުން އައްޔަން ކުރުމަށް ހަމަޖެހިފައިވާ ދެ މެންބަރުންގެ މަޤާމް ހުސްވުމާއި ގުޅިގެން ކަމުގައިވެސް ބޭންކުން މަޢުލޫމާތު ދެއްވައެވެ. އަދި އަންނަ ޖުލައިމަހު ހުސްވެފައިވާ މަޤާމުތަކަށް މެންބަރުން އަންޔަން ކުރުމަށް ޖަލްސާއެއްބޭއްވުމަކީ ބޭންކުގެ އަމާޒެއް ކަމުގައިވެސް ހާމަކޮށްފައިވެއެވެ.
