މިއަދު ކުއްލިއަކަށް ސޯޝަލް މީޑިއާއަށް ތިލަވެގެން ދިޔައީ ފޭރުމުގެ މުޅިން އާ ގޮތެއްގެ ވާހަކައެވެ.
ހުޅުމާލޭ ދެވަނަ ފިޔަވަހީގެ ހިނގަމުންދާ މިކަމަކީ ދޮށީ އުމުރުގެ ފިރެހެނުންނަށް އަމާޒުކޮށްގެން ދުރާލައި ރާވައިގެން ހިންގާ ފޭރުމުގެ ޖަރީމާއެކެވެ.
މިކަން ކުރާގޮތެއްކަމަށް ސޯޝަލް މީޑިއާގައި ބައެއް މީހުން ހާމަކޮށްފައިވަނީ،އަންހެންކުއްޖާ ފުލެޓް ސަރަހައްދުން ފެންނަ އުމުރުން ދުވަސްވީ ދޮށީ ފިރެހެނުންނަށް އަމާޒުކޮށް ވާހަކަ ދައްކާ ގުޅުން ބަދަހި ކުރަނީއެވެ.އެއަށްފަހު ފްލެޓަށް އައުމަށް ދައުވަތުދީގެން ގެންނަނީއެވެ.
އެހާ ހިސާބުން ފިލާތިބޭ ދެތިންމިހަކު ދޮރު ތަޅުލައި ، އެމީހަކު ބަރަހަނާކޮށް ވީޑިއޯ ކޮށް، ބިރުދައްކައިގެން ފައިސާ ހޯދަނީއެވެ. މިކަމުގައި ބައިވެރިވާ މީހުން ބުނާ އެކައުންޓަކަށް ފައިސާ ޖަމާނުކޮށްފިނަމަ ވީޑިއޯ ލީކު ކޮށްލާނެ ކަމަށް ބުނެ ބިރުދައްކާ މަޖުބޫރު ކުރުވުމަށްފަހު އަތުގައި ހުރި އެއްޗެއް ހޯދަނީއެވެ. ހިޔާ ފްލެޓުގައި އުޅޭ ފަރާތަކުން މުރާސިލަށް މައުލޫމާތު ދެމުން ބުނީ މިފަދަ ބައެއް މައްސަލަތައް ފުލުހުންނަށް ހުށައަޅާފައިވާއިރު ބައެއް މީހުން މިކަމުގެ ބާވަތުން ކަމާބެހޭ ފަރާތްތަކަށް ރިޕޯޓުކުރަން ޖެހިލުންވާ ކަމަށެވެ.
މިކަމާއި ގުޅިގެން ފުލުހުން މީޑިއާތަކަށް ފޮނުވި މެސެޖެއްގައި ބުނެފައިވަނީ ވާހަކަ ދައްކައި ހައްދާލައިގެން ހުޅުމާލޭ ދެވަނަ ފިޔަވަހީގެ ޓަވަރެއްގެ އެޕާޓްމަންޓަކަށް މީހުން ގެންގޮސް ފޭރޭ މައްސަލަ ފުލުހުންނަށް ރިޕޯޓުކޮށްފައިވާ ކަމަށެވެ. މި މައްސަލަ ތަހުގީގު ކުރަމުންދާ ކަމަށް ވެސް ފުލުހުން ބުނެފައިވެއެވެ.
އަދި މިފަދަ ކަންކަމަށް ސަމާލުވުމަށްށާއި ގޮތްނޭނގޭ މީހުން ބުނާ ތަންތަނަށް ނުދިއުމަށް ފުލުހުން ވަނީ ރައްޔިތުންނަށް އިލްތިމާސްކޮށްފައެވެ.
މުޖުތަމަޢުގައި ހިނގާ މިފަދަ ކުށްތައް ހުއްޓުވޭނީ މުޖުތަމަޢުގައި ދިރިއުޅޭ ވަކި ވަކި ފަރުދުން ޒިންމާދާރުވެ، މިފަދަ ކުށްތަކުން ސަލާމަތްވުމަށްޓަކައި ކަމާއިބެހޭ މުއައްސަސާތަކަށް މިކަމާއި ގުޅޭ މައުލޫމާތުދީ ހޭލުންތެރި ބަޔަކަން ވެގެންނެވެ.
