މި މަހުގެ 16 ވަނަ ދުވަހުން ފެށިގެން އާއިލާއަށް ހަބަރު ނުވެ ގެއްލިގެން ހޯދަމުންދިޔަ ޒުވާނާ އަހުމަދު އައިމަން މަރުވެފައި އޮއްވާ ފެނިއްޖެއެވެ.
މއ.ބޯޅަކިންކިރިމާގެ، އަހުމަދު އައިމަން (30) އެންމެ ފަހުން ފެނިފައިވަނީ މި މަހުގެ 16 ވަނަ ދުވަހުގެ ރޭ 9.30ހާއިރު އޭނާ ދިރިއުޅެމުންދިޔަ ގެއިންނެވެ. އޭގެ ފަހުން ހަބަރެއް ނުވުމުން އާއިލާގެ އެދުމުގެ މަތިން ފުލުހުންވަނީ އައިމަން ހޯދުމަށް އާއްމުންގެ އެހީތެރިކަމަށް އެދިފައެވެ.
30 އަހަރުގެ މި މީހާ މަރުވެފައި އޮތްކަމުގެ ރިޕޯޓް ފުލުހުންނަށް ލިބިފައިވަނީ މިއަދު 2:30 ކަން ހާއިރު، މާފަންނު ރަބީޢުވިލާގެ ގްރައުންޑް ފުލޯގައި މީހަކު މަރުވެފައި އޮތް ކަމުގެ ހަބަރު ފުލުހުންނަށް ބަޔަކު ރިޕޯޓް ކުރުމުންނެވެ. މީހުން ދިރިނޫޅޭ މި ގެއިން ފެނިފައިވަނީ ގެއްލިގެން ހޯދަމުންދާ އަހުމަދު އައިމަން ކަމަށް ފުލުހުންނާއި އާއިލާއިން ކަށަވަރުކޮށްދީފައިވަނީ މިރޭގެ ވަގުތެއްގައެވެ.
މއ.ރަބީއުވިލާއިން ފެނުނު ހަށިގަނޑުވަނީ ވަރަށް ބޮޑަށް ހަލާކުވެފައި ކަމަށް މަންޒަރުދުށް މީހުން މުރާސިލަށް މައުލޫމާތުދެއެވެ. އެހެން ކަމުން އެއީ އައިމަން ކަމަށް ކަށަވަރު ކުރުމަށް އެހާ ގިނަ ވަގުތު ނެގި ސަބަބަކީވެސް އެއީ ކަމަށް އެ ފަރާތުން މައުލޫމާތުދެއެވެ.
