އިސްރާޢީލްގެ ބޮޑު ވަޒީރު ބެންޖަމިން ނަތަންޔާހޫ އަދި އިސްރާޢީލްގެ ޑިފެންސް މިނިސްޓަރ ޔޯއަވް ގަލަންޓް ހައްޔަރުކުރުކުރުމުގެ އަމުރަކަށް އިންޓަރނޭޝަނަލް ކުރިމިނަލް ކޯޓްގެ ޕްރޮސެކިއުޓަރ ޖެނެރަލް އެދިވަޑައި ގަތުމުން އެކަމަށް ދިވެހިރާއްޖޭގެ ރައީސުލް ޖުމްހޫރިއްޔާ ޑރ.މުހައްމަދު މުއިއްޒު މަރުހަބާ ވިދާޅުވެއްޖެއެވެ.
އެކްސް ގައި އެމަނިކުފާނު ކުރެއްވި ޕޯސްޓެއްގައި މިކަން ފާހަގަކޮށް، މިއީ ފަލަސްތީނުގެ ރައްޔިތުންނަށް އިންސާފު ހޯދައި ދިނުމަށްޓަކައި އެޅިގެންދިޔަ ވަރަށް މުހިންމު ފިޔަވަޅެއްގެ ގޮތުގައި ފާހަގަ ކުރައްވާފައިވެއެވެ. އަދި އެއްވެސް ޤައުމަކީ ބައިނަލް އަޤްވާމީ ގޮތުން އުފެދިފައިވާ ގާނޫނުތަކަށް ވުރެ މަތީ ބާރުތަކެއް ލިބިފައިވާ ގައުމެއް ނޫންކަމާއި، ފަލަސްތީނު ހިމެނޭ ސަރަހައްދުގައިހަނގުރާމައިގެ ޖަރީމާތައް ހިންގަމުންދާ ފަރާތްތަކުން އެކަމަށްޖަވާބުދާރީވާން ޖެހޭނެކަމަށް ރައީސް ޑރ. މުޢިއްޒުގެ ޕޯސްޓްގައި ވިދާޅުވެފައިވެއެވެ.
ދިވެހިރާއްޖެއަކީ 2011 ވަނަ އަހަރުން ފެށިގެން ރޯމް ސްޓޭޓޫޓްގެ ބައިވެރިއެކެވެ. މިކަން ފާހަގަ ކުރައްވާ ރައީސް ވިދާޅުވީ ދިވެހިރާއްޖެއަކީ ރޯމް ސްޓޭޓޫޓްގައި ބައިވެރިވާ ދަޢުލަތެއްކަމަށްށާއި، އިސްރާޢީލުން ޣައްޒާގައި ހިންގަމުންދާ ހަނގުރާމައިގެ ޖަރީމާތަކާއި އިންސާނިއްޔަތާއި ދެކޮޅަށް ހިންގާ ޖަރީމާތަށް ސާބިތުވާވަރަށް ހެކި ޕްރޮސެކިއުޓަރ ޖެނެރަލް އެއްކޮށްފައިވާނެކަމަށް ޤަބޫލުފުޅު ކުރައްވާކަމަށްށެވެ. އަދި ބައިނަލް އަޤްވާމީ މައިދާނުގައި ފަލަސްތީނުގެ ރައްޔިތުންނަށް އެހީތެރިވުމަށްޓަކައި ދިވެހިރާއްޖެއިން މަސައްކަތް ކުރައްވާނެކަމަށްވެސް އެމަނިކުފާނު ވިދާޅުވިއެވެ.
އެމަނިކުފާނުގެ ޕޯސްޓަށް ރައްދުދެއްވަމުން ބައެއްއާންމު ރައްޔިތުންވަނީ އިސްރާޢީލްގެ ޕާސްޕޯޓް މިޤައުމުގައި ބޭނުން ނުކުރެވޭ ގޮތް ހެދުމަށްށާއި އެޤައުމުގެ ފަތުރުވެރިން ދިވެހިރާއްޖެއަށް އެތެރެވުން ހުއްޓުވުމަށް ގޮވާލާފައެވެ.
