ރާއްޖޭގައި ފުޅާ ދާއިރާއެއްގައި ހަށި ވިއްކަމުން ދިޔަ ބިދޭސީންތަކެއް ހައްޔަރުކޮށްފިއެވެ.
އިމިގްރޭޝަނުން މައުލޫމާތުދޭ ގޮތުގައި މި އަހަރުގެ ސެޕްޓެމްބަރު މަހާއި އޮގަސްޓު މަހު ފުލުހުންނާއި އިމިގްރޭޝަނާއި ގުޅިގެން ހިންގުނު އޮޕަރޭޝަނެއްގައި އެ އިދާރާގެ ބެލުމުގެ ދަށަށް ގެނެސްފައިވަނީ ރާއްޖޭގައި ފުޅާ ދާއިރާއެއްގައި ހަށި ވިއްކަމުންދިޔަ ބިދޭސީ 5 އަންހެނުންނާއި އެމީހުންގެ އެޖެންޓެއްގެ ގޮތުގައި މަސައްކަތް ކުރަމުންދިޔަ ބިދޭސީ ފިރިހެނެކެވެ. މި މީހުންގެ ތެރެއިން 3 މީހުން މިހާރުވަނީ ރާއްޖެ ނާދެވޭ ގޮތަަށް ޑީޕޯޓުކޮށްލާފައެވެ. ބަކީ ތިބި އަނެއް 3 މީހުން ޑީޕޯޓު ކުރުމުގެ މަސައްކަތް ކުރަމުންދާ ކަމަށްވެސް އިމިގްރޭޝަނުން މައުލޫމާތު ދެއެވެ.
މީގެ ކުރިންވެސް ވަނީ ރާއްޖޭގައި ހަށި ވިއްކުމުގައި ހަރަކާތްތެރިވި ބިދޭސީންތަކެއް ޑީޕޯޓުކޮށްފައެވެ. މި ފަދަ އޮޕަރޭޝަންތަކުގެ ތަފްސީލެއް މި ފަހުން ފުލުހުންވެސް އަދި އިމިގްރޭޝަނުންވެސް ހާމައެއް ނުކުރެއެވެ. މި މީހުން ހަށި ވިއްކުމުގެ މަސައްކަތުގައި ހަރަކާތްތެރިވީ ކިހިނެތް ކަމެއްވެސް ހާމަކޮށްފައި ނުވެއެވެ. ނަމަވެސް ރާއްޖޭގައި މަސާޖު ޕާލާ ނަމުގައި ހިދުމަތްދޭ ތަންތަނުގައި ހަށި ވިއްކަމުންދާ ކަމަށް ބުނެ ބައެއް އާއްމުން އަންނަނީ ކަންބޮޑުވުން ފާޅު ކުރަމުންނެވެ. ބައެއް މަސާޖު ޕާލާ ތަކުގައި އެތާ މަސައްކަތްކުރާ ކުދިންގެ ފޮޓޯއާއި އެކު ސޯސަލް މީޑިއާގައި އަންނަނީ އިސްތިހާރުވެސް ކުރަމުންނެވެ.
