އާ ސަރުކާރުގައި ކެބިނެޓު ވަޒީރުންގެ ގޮތުގައި އައްޔަން ކުރައްވާނީ ނަތީޖާ ނެރެވޭނެ ރެއާއި ދުވާލު މަސައްކަތް ކުރެވޭނެ ބޭފުޅުން ކަމުގައި އިންތިހާބީ ރައީސް ޑރ. މުއިއްޒު ވިދާޅުވެއްޖެއެވެ. އެމަނިކުފާނުގެ ސަރުކާރުގައި 22 މިނިސްޓްރީ ހުންނައިރު ހަރަދު ބޮޑުވާނެ ކަމަށް ދެކެވޭ ވާހަކައަށް ރައްދު ދެއްވަމުން ވިދާޅުވީ ހަރަދުތައް އެއްވަރެއްގައި ހިފެހެއްޓި އަވަހަށް ހިދުމަތް ފޯރުކޮށްދެއްވޭނެ ކަމަށެވެ. އެކަމުގެ ސަބަބުން ހަރަދު ބޮޑުވާނެ ކަމަށް ގަބޫލުފުޅު ނުކުރެއްވޭ ކަމަށެވެ.
ޖުމްހޫރީ ދުވަހާއި ގުޅިގެން ދައުލަތުގެ މީޑިއާ ޕީއެސްއެމްއިން ގެނެސްދިން ޚާއްޞަ ޕްރޮގްރާމްގައި ވާހަކަފުޅު ދައްކަވަމުން އިންތިޚާބީ ރައީސް ޑރ. މުޙައްމަދު މުޢިއްޒު ވިދާޅުވީ އެމަނިކުފާނުގެ ކެބިނެޓް އެކުލަވާލެއްވުމުގައި ސަރުކާރުގެ މެނިފެސްޓޯ ތަންފީޒުކުރެވޭނެ ބޭފުޅުންނަށް އިސްކަން ދެއްވާފައިވާނެކަމަށެވެ. އަދި ކެބިނެޓުގައި ތިއްބަވާނީ ރައީސުލްޖުމްހޫރިއްޔާގެ ޙައިސިއްޔަތުން ނިންމަވާ ނިންމެވުންތަކަށް އިޙްތިރާމްކުރައްވާ، އެމަނިކުފާނަށް ފަހުބަސް އިއްވުމުން އެކަމުގައި އިތުރު މީހެއްގެ ބަހެއް ހޯދަންނުޖެހޭ މީހުންކަމަށް ޑރ.މުޢިއްޒު ވިދާޅުވިއެވެ.
ކެބިނެޓަށް ނަންގަވާނެ ބޭފުޅުންނާއި ގުޅޭގޮތުން ކެމްޕޭންގެ ތެރޭގައި ދެއްކެވު ހުރިހާ ވާހަކަތަކަށް ރިޢާޔަތްކުރެއްވިކަމަށެވެ. އެގޮތުން ހުރިހާ އެންމެން ޝާމިލުވާ އަދި ރައްޔިތުންނަށް ވެވަޑައިގަންނަވާފައިވާ ވަޢުދުތައް ފުއްދުމަށް ރެއާއި ދުވާލު މަސައްކަތް ކުރެއްވުމުގެ ހިތްވަރު ހުރި ކެބިނެޓަކަށް އެމަނިކުފާނުގެ ޓީމުވާނެކަމަށް ޑރ.މުޢިއްޒު ވިދާޅުވިއެވެ. އިސްކަންދެއްވީ އެމަނިކުފާނު ބޭނުންވާ ނަތީޖާ ނެރެދެއްވާނެ ޓީމެއް އެކުލަވާލެއްވުމަށްކަމަށް އިންތިޚާބީ ރައީސް ވިދާޅުވިއެވެ. ޑރ.މުޢިއްޒު ވިދާޅުވީ އެމަނިކުފާނުގެ ކެބިނެޓަކީ ޤައުމުގެ ހަމަޖެހުން ޤާއިމުކޮށް ވަޢުދުތައް ފުއްދުމަށްޓަކައި ބޭނުންވާނެ ތަޢުލީމީ އަދި ޤާބިލް ކެބިނެޓެއްކަމަށެވެ.
ބައެއް މީޑިއާތަކުންނާއި ސޯސަލް މީޑިއާއިން އިންތިހާބީ ރައީސް ގެ ކެބިނެޓް ކަމަށް ދައުރުވަމުންދާ ލިސްޓާ ބެހޭގޮތުން ވިދާޅުވީ ”ނުކުމެގެން އުޅޭ ލިސްޓްގެ 95 އިންސައްތައަކީ ރަނގަޅު ލިސްޓެކޭ ދެންނެވިދާނެ. ކިތަންމެ ސިއްރު ކުރިޔަސް ސިއްރެއްގޮތަކަށް ނުއެއް އޮންނާނެ. އެކަކުކައިރީގައި ބުނީމަ އޭނަގެ އެންމެ ގާތްމީހާ ކައިރީ އޮންނާނީ ބުނެވިފަ. އެއީ ދެން މައްސަލައެއްވެސް ނޫން.“ ކަމަށެވެ.
