މަޖުލީހުގެ ރައީސް މުހައްމަދު ނަޝީދު ހުއްޓުވާފައި އޮތް ކުނި މެނޭޖްކުރުމާއި ޕްލާސްޓިކް ކޮތަޅުން ލާރި ނެގުމުގެ ބިލުގެ ބަހުސް މަޖުލީހުގައި އަލުން ފަށައިފިއެވެ.
ޕްލާސްޓިކު ކޮތަޅު މަދުކުރުމުގެ ގޮތުން ސަރުކާރުން ލާރި ނަގަން ފެށި އިރު އާއްމުންނަށް ދިމާވި ދަތިތަކަށް ހައްލު ހޯދުމަށް ސަރުކާރުން ހުށައެޅި ބިލު ހުއްޓުވީ ރައީސް ސޯލިހާއި ދެމެދު ނަޝީދު ހިތްހަމަ ނުޖެހުން އުފެދުނު މައްސަލާގައި ސަރުކާރަށް ޖެއްސުން ކުރުމުގެ ނިޔަތުގައި ކަމަށް އޭރު މެމްބަރުން ތުހުމަތު ކުރަމުންދިޔައެވެ. މިއަދުގެ ބަހުސްގައި ކުނި މެނޭޖުކުރުމުގެ ގާނޫނުގެ ދަށުން ފިހާރައިން މުދާ ގަންނަ އިރު ޕްލާސްޓިކު ކޮތަޅަށް މިހާރު ނަގަމުން އަންނަ ދެ ރުފިޔާގެ ޓެކްސް 50 ލާރިއަށް ކުޑަ ކުރަންވެސް ވަނީ ރައްޔިތުންގެ މަޖިލީހަށް ހުށަހަޅާފައެވެ.
ސަރުކާރުގެ ފަރާތުން ކޮމަންޑޫ ދާއިރާގެ މެންބަރު މުހައްމަދު ރާޝިދު މަޖިލީހަށް ހުށަހެޅުއްވި ކުނި މެނޭޖު ކުރުމުގެ ބިލުގެ ބަހުސްގައި، ކޮތަޅުން ނަގާ ދެ ރުފިޔާ 50 ލާރިއަށް ކުޑަކުރަން ހުށަހެޅުއްވީ ހޯރަފުށީ ދާއިރާގެ މެމްބަރު އަހުމަދު ސަލީމެވެ.
ވިޔަފާރީގެ މުއާމަލާތްތަކުގައި ބޭނުންކުރާ ޕްލާސްޓިކް ކޮތަޅުން ދެ ރުފިޔާގެ ފީއެއް ނަގަން ފެށީ މިދިޔަ އަހަރުގެ ޑިސެމްބަރު މަހުގެ 18 ވަނަ ދުވަހު ތަސްދީގުކުރެއްވި ކުނި މެނޭޖުކުރުމުގެ ގާނޫނަށް ގެނައި އިސްލާހެއްގެ ދަށުންނެވެ.
